Qostanaıda «Jol qaýipsizdigi aptalyǵy» respýblıkalyq aksııasy sheńberinde qaladaǵy Qostanaı avtomektepteri qaýymdastyǵy Jergilikti polısııa qyzmetimen birlesip, avtomektepterdiń oqýshylary arasynda baıqaý uıymdastyrdy. Aǵa ınspektor Elena Magasýmovanyń aıtýynsha, kólik júrgizýshilerin daıyndaý sapasyn kóterý, sóıtip jol qozǵalysy qaýipsizdigine oń yqpal etý baıqaýdyń basty maqsaty boldy.
«Bolashaq júrgizýshiler aldymen test tapsyrý arqyly jol qozǵalysy erejelerinen bilimin kórsetti. Sosyn avtokólik júrgizýden synǵa tústi» deıdi polısııa maıory Elena Magasýmova. Qazylar alqasy músheleriniń pikirinshe, baıqaýǵa qatysqandar qoıǵan tapsyrmalardy negizinen jaqsy oryndap shyqty. Baıqaý qorytyndysy boıynsha birinshi oryndy «Vı-Kar» avtomektebiniń oqýshysy Dáýlet Qudabaev, ekinshi oryndy VIP avtomektebiniń oqýshysy Baljan Qudaıbergen, úshinshi oryndy «Vı-Kar» avtomektebiniń oqýshysy, jol qozǵalysy erejesinen jaqsy bilimin kórsetken Anastasııa Klımovıch aldy. Baıqaýda oqýshylary jol qozǵalysy erejesi men avtokólikti meńgerýde jaqsy nátıjeler kórsetken «Vı-Kar» avomektebi úzdik dep tabyldy.
Názıra Járimbet,
«Egemen Qazaqstan»
Qostanaı