Syrtqy ister mınıstrliginde «Qazaqstan Respýblıkasynyń BUU Qaýipsizdik Keńesine músheligi» taqyrybynda «Mereıtoılyq jáne ataýly kúnder» serııasynan poshtalyq markany óshirýdiń saltanatty rásimi ótti. Is-sharaǵa Syrtqy ister mınıstriniń orynbasary Erjan Ashyqbaev jáne «Qazposhta» AQ Basqarýshy dırektory Baýyrjan Aınabekov qatysty, dep habarlaıdy SIM baspasóz qyzmeti.
2017 jyldyń qańtarynda Qazaqstan 2017-2018 jyldarǵa Birikken Ulttar Uıymy Qaýipsizdik Keńesiniń turaqty emes múshesi bolyp Ortalyq Azııa memleketteri arasynan alǵashqy el retinde saılanǵan bolatyn. Mundaı joǵary laýazymǵa daýys berý kezinde Qazaqstan úshin BUU-nyń 138 múshesi daýys berdi. Bul fakt elimizdiń jahandyq turaqtylyq pen qaýipsizdikti nyǵaıtýǵa qosqan úlesin moıyndaýyn, sondaı-aq Qazaqstan Prezıdenti Nursultan Nazarbaevtyń halyqaralyq arenadaǵy joǵary bedelin kórsetedi.
E. Ashyqbaevtyń aıtýynsha, Qazaqstannyń BUU Qaýipsizdik Keńesine músheligi 27 jyldyq Táýelsizdigimizdiń kezeńinde elimizdiń mańyzdy syrtqy saıası jetistikteriniń biri bolyp tabylady. «Búgingi saltanatty rásim Qazaqstannyń Tuńǵysh Prezıdenti Kúni qarsańynda ótkizilgeni sımvolıkalyq mánge ıe. Atap aıtqanda, Elbasy Nursultan Nazarbaevtyń elimizdiń BUU Qaýipsizdik Keńesiniń turaqty emes múshesi retinde saılanýyndaǵy úlesi negizgi oryn alýda», dep, Mınıstrdiń orynbasary atap ótti.
Poshtalyq marka tórt boıaýdan turatyn ofsettik baspa retinde shyǵarylyp, paraǵy 10 markadan turady. Taralymy - 20 000 dana. Baǵasy 250 teńgeni quraıdy.