Táýelsizdik kúni merekesi qarsańynda Elbasy kitaphanasynyń mýzeıi ǵımaratynda el Prezıdenti Nursultan Ábishulyna shet memleketter men úkimet basshylary, shetel delegasııalary, el turǵyndary tartý etken syılyqtardan turatyn arnaıy ekspozısııa zaly ashyldy.
Mýzyka aspaptarynyń kolleksııasyna qarapaıym aspaptardan bastap, qurylymy men oryndaý múmkindigi boıynsha asa kúrdeli bolatyn 35 jádiger qoıylǵan. Jalpy, «Álem halyqtarynyń mýzyka aspaptary» turaqty kórmesin qurý ıdeıasy EKSPO-2017 halyqaralyq kórmesi kezinde mýzeıge kelgen qonaqtardyń qyzyǵýshylyǵynan týyndaǵan. Al «Qazaqstannyń sporttyq dańqy» ekspozısııasy Ulttyq olımpıada komıtetiniń yntymaqtastyq jónindegi memorandýmy aıasynda uıymdastyrylatyn is-sharalar qataryn jalǵastyrady. Kezekti bir mártebeli jeńisten soń «Jeńisimdi Elbasyna arnaımyn» dep jatatyn dańqty sportshylardyń tartý etken syılyqtary, máselen, V.Jırov pen M.Mázimbaevtyń belbeýin, A.Vınokýrovtyń velosıpedi men kıimin de osy qatardan kóre alasyz.
Jıynǵa bokstan halyqaralyq dárejedegi sport sheberi, boksshy Mereı Aqshalov, Memlekettik kúzet qyzmeti Prezıdent orkestriniń án jáne estrada ansambli basshysy, maıor Maral Sahmetova qatysyp, merekelik keshtiń shyraıyn kirgizdi.
Aıa О́MIRTAI,
«Egemen Qazaqstan»