Búginde elimizdegi «Pedagog mártebesi týraly» zań jobasynyń tujyrymdamasy qoǵamda qyzý talqylanyp jatyr. Bul – Elbasy Nursultan Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda júktegen ózekti ári kúrmeýli máselelerdiń biri. Atalǵan zań jobasy bilim berý uıymdarynyń quqyqtary men kepildikterin, pedagogıkalyq jáne ǵylymı jumystaryn júzege asyrýdy, sondaı-aq bilim berý deńgeıiniń, menshik nysandarynyń, bilim berý uıymdarynyń tıpi men túrlerine qaramastan memlekettik, qoǵamdyq qoldaý jáne taný sharalaryn júzege asyrýdy qamtıtyn muǵalim mártebesin kóterýge baǵyttalǵan. Taıaýda qoǵam tarapynan túsken usynystardyń eleýli bóligin Bilim jáne ǵylym mınıstrligi de bir elekten ótkizdi. Árıne osyǵan deıin qordalanyp qalǵan túıtkilderdiń túıinin tarqatýǵa jańa zań jobasy qaýqarly bolýy tıis. Sondyqtan bul máseleni egjeı-tegjeıli pysyqtap alǵan jón.
Barlyq muǵalimder qaýymy Elbasynyń bıylǵy Joldaýynda Bilim jáne ǵylym mınıstrligine tapsyrǵan «Pedagog mártebesi týraly» jańa zań jobasynan úlken úmit kútedi. Máselen «Bilim týraly» zańda pedagogtardyń mártebesi men quqyqtary jan-jaqty qorǵalyp, jazylǵan. Biraq jańadan ázirlenip jatqan zań jobasynda ustaz mártebesinen góri, bilim salasynyń aınalasyndaǵy tolyp jatqan nusqaýlyq, erejelerdiń tarmaqtary basymdaý kórinedi. Sondyqtan pedagogtardyń mártebesi týraly zań jobasy jiti qadaǵalanyp, ustaz, ata-ana, oqýshy úshtiginiń ortaq quqyqtary men talap-tilekteri tolyq eskeriledi dep oılaımyn. Eń bastysy, jańa zań qysqa da nusqa jazylyp, onda aǵartýshylyqpen aınalysatyn jandardyń mártebesi men quqyqtary qorǵalýy kerek.
Osylaısha Prezıdent tapsyrmasymen qolǵa alynǵan bilim salasyndaǵy bul reforma oń jalǵasyn tabady dep senemin. Negizinen jańadan qabyldanatyn zań muǵalimder qaýymyn jańa satyǵa shyǵaratyn tetik bolýy kerek. Elbasy Nursultan Nazarbaev óz sózinde aıtyp ótkendeı, budan bylaı muǵalimniń mindetine kirmeıtin fýnksııalar kóleminiń artyq bolýy atalǵan zań aıasynda oń sheshimin tabýy shart. Olaı etpegen jaǵdaıda aı saıyn qajetti deńgeıdegi aqyǵa qol jetkizý úshin muǵalimderdiń shekten tys jumys isteýge májbúrligi, kóptegen jeńildik pen kepildemeni alýdyń qıyndyǵy esh sheshimin taba almaıdy.
Sondaı-aq pedagog mamandyǵyna er adamdardyń barmaýy, mektepke deıingi tárbıe men bilim berý salasynda, aǵylshyn tili jáne taǵy basqa naqty mamandyqta sabaq beretin ustazdardyń jetispeýshiligi men eńbekaqynyń tómendigi de jańa zań negizinde jaqsy jetistikterge bastaýy tıis.
Alına SOLOVEVA,
Qazaqstannyń Eńbek Eri,
A.Pýshkın atyndaǵy №1 mektep-gımnazııanyń bıologııa pániniń muǵalimi
ShYMKENT