Nazarbaev zııatkerlik mektepterinde 2012-2013 oqý jylynan bastap oqýshylardyń «Ýıkıpedııa» klýby jumys istep keledi. Sodan beri qazaqsha elektrondy ensıklopedııa qory jas qalamgerler jazǵan 20 myńnan astAam maqalamen tolyǵypty.
Jaqynda osy arnaýly mektepter aıasynda Wiki Camp aksııasy ótken edi. Bul sharaǵa Taldyqorǵan qalasyndaǵy fızıka-matematıka baǵytyndaǵy Nazarbaev zııatkerlik mektebiniń júzge jýyq oqýshysy da qatysty. Dástúrli aksııa bıylǵy Jastar jylyna oraı «Jastar – elimizdiń maqtanyshy» degen uranmen uıymdastyryldy.
«Ýıkıpedııa» klýby Taldyqorǵandaǵy Nazarbaev zııatkerlik mektebinde de 2013 jyly quryldy. Osy ýaqyt ishinde oqýshylar qazaq, aǵylshyn, orys tilderinde maqala jazyp, ony onlaın-ensıklopedııaǵa óz betinshe joldap, tolyqtyrýdy meńgergen eken. Búginge deıin «Ýıkıpedııa» klýbynyń músheleri Jetisý óńirindegi tarıhı-mádenı mura týraly, ǵylymı jańalyqtar men elimizdiń qazirgi zamanǵy jetistikteri týraly 3 myńǵa jýyq maqala jazyp, saıtqa ornalastyrypty.
Aıtpaqshy, osy mekteptegi «Ýıkıpedııa» klýbynyń alǵashqy prezıdenti bolǵan oqýshy, búginde stýdent atanǵan Qudaıbergen Dáýletkereı Gonkongta jáne Londonda ótken «Wikimania-2013», «Wikimania-2014» halyqaralyq konferensııalaryna qatysyp, qazaq balalarynyń jazba jumysyn álem nazaryna tanystyrdy.
– «Ýıkıpedııa» klýby mektep oqýshylaryn maqala jazýǵa jáne redaksııalaýǵa daǵdylandyrady, deıdi Taldyqorǵandaǵy Nazarbaev zııatkerlik mektebi janyndaǵy «Ýıkıpedııa» klýbynyń úılestirýshisi Názıra Sultanova.
Qalmahanbet MUQAMETQALI,
«Egemen Qazaqstan»
Almaty oblysy