Prezıdent 2019 jylǵy 30 qańtarda ótken keńeıtilgen otyrysta sala aldyna birqatar mindetter qoıdy. Aýyl sharýashylyǵy mınıstri О́. Shókeev Memleket basshysynyń tapsyrmalaryn oryndaý boıynsha qabyldanatyn sharalarǵa toqtaldy.
«Et eksportyn arttyrý boıynsha berilgen tapsyrmany oryndaý úshin etti mal sharýashylyǵyn damytý baǵdarlamasyn iske asyrý jalǵasatyn bolady. Oǵan qarjy bólindi jáne naqty ındıkatıvter aıqyndaldy, ol úshin: 1,2 mln. bas iri qara maldy tuqymdyq túrlendirý; bordaqylaý alańdaryna 353,6 myń bas buqashyq jetkizý; 100,0 myń bas iri qara mal (ákelý josparlanyp otyrǵan elder: Aýstralııa, AQSh, Kanada, Ońtústik Amerıka, Eýropa jáne Reseı) jáne 415,75 myń bas usaq mal satyp alý qajet», deıdi О́. Shókeev.
Mınıstrdiń aıtýynsha, 2019 jyly 30 myń tonna sıyr etin eksporttaý josparlanyp otyr. Shalǵaıdaǵy mal sharýashylyǵyn damytý maqsatynda 2018 jyly qudyqtardy salý jospary 722 birlikti qurasa, naqty 1873 birlik (259%) qudyq salyndy. Onyń ishinde 1369 qudyqty salýǵa 6082 mln. teńge sýbsıdııa berildi.
Nátıjesinde 2244,4 myń gektar jaıylym, onyń ishinde 186,5 myń bas iri qara mal, 531,6 myń bas usaq mal, 57,4 myń bas jylqy, 34,3 myń bas túıe sý kózimen qamtamasyz etildi 2019 jyly respýblıka boıynsha 1069 birlik qudyq salý josparlanýda. Qudyq salýǵa ketken shyǵynnyń 80%-yn memleket sýbsıdııalaıdy. Oǵan bıyl 4,8 mlrd. teńge kózdelgen.
Sondaı aq Memleket basshysynyń Astana qalasynda shujyq óndiretin zaýyt salý jónindegi tapsyrmasynyń sheńberinde «Ereımentaý Aqbas» kompanııasy zamanaýı et kombınatyn salý jobasyn iske asyrýda.
«Jobanyń quny 5,4 mlrd. teńgeni quraıdy. Et kombınaty jylyna 20 myń tonna et óńdeıdi. Kásiporynǵa Eýropada óndirilgen jabdyqtar ornatylady. Onda mal soıý, shujyq ónimderi men et konservilerin óndirý júzege asady. 150 adamǵa jumys orny ashylatyn bolady», deıdi mınıstr.
Daıyn ónimdi Reseı, Qytaı jáne Taıaý Shyǵysqa eksporttaý josparlanyp otyr. Obektini salý úshin Astana qalasynyń ákimdigi 3,2 gektar jer ýchaskesin bóldi. Qazirgi ýaqytta qurylys jumystary bastaldy. Et kombınaty 2019 jyldyń 4 toqsanynda iske qosylatyn bolady.