Búgin Úkimet otyrysynda Premer-Mınıstr Baqytjan Saǵyntaev jylý berý maýsymy aıaqtalǵansha órt qaýipsizdigi aılyǵyn qaıta bastaý kerektigin aıtty.
«Aldaǵy táýlikterde birqatar óńirde kún sýytady dep kútilýde. Sol sebepti ákimdikterdiń, órt sóndirý jáne tótenshe jaǵdaılar qyzmetteriniń nazaryn órt qaýpi máselesine aýdaramyn. Jylý berý júıelerinde jylý temperatýrasy artady. Jeke úılerde pesh jaǵý kúsheıedi. Sondyqtan qaýipsizdik tehnıkasynyń saqtalýyna erekshe mán berińizder. IIM jergilikti atqarýshy organdarmen birlesip, jylý berý maýsymy aıaqtalǵansha órt qaýipsizdigi aılyǵyn qaıta bastasyn. Qalmuhanbet Nurmahanbetuly, bul másele sizdiń jeke baqylaýyńyzǵa», dedi Baqytjan Saǵyntaev Ishki ister mınıstri Qasymovqa.
Sondaı-aq Úkimet basshysy jylý men energııa beretin barlyq uıymdar, ákimdikterdiń turǵyn úı-kommýnaldyq qyzmetteri tutynýshylardy jetkilikti deńgeıde jylýmen jáne jaryqpen qamtamasyz etsin degen tapsyrma berdi. «Barlyq qyzmetter irkilissiz jáne apatsyz jumys isteýi qajet. Ákimdikterdiń erekshe baqylaýyna alynsyn», dedi Baqytjan Saǵyntaev. Premer-Mınıstr órt qaýipsizdigin tekserýshilerdiń negizsiz qylyqtaryn áleýmettik jelide synǵa alý kúsheıip turǵanyna da toqtaldy. «Áleýmettik jelilerde aıtylyp jatyr, tekserýshiler jeke úılerge órt qaýipsizdigin tekserýge kelgen kezde úıge kiredi eken de: «Eshteńe teksermeı-aq qoıaıyn, aqsha berseń kete beremiz» deıdi eken. Máseleniń barlyǵy sodan bastalyp otyr. Osyǵan basa kóńil aýdaryńyzdar. Qatań talap bolýy kerek. Sonda ǵana keshegideı bolǵan qaıǵyly jaǵdaıǵa jol bermeımiz», - dedi ol. Sonymen qatar Baqytjan Saǵyntaev órtten qaza tapqan 5 balanyń ata-anasyna kóńil aıtty.
Eske sala keteıik, 4 aqpan kúni túnde Astanadaǵy «Kóktal-1» móltek aýdanynda jeke úıdiń aýlasynda turǵyzylǵan ýaqytsha baspanada órt shyqty. О́rtti sóndirý barysynda 13 jasar, 11 jasar, 5 jasar, 3 jasar jáne 3 aılyq - 5 qyz balanyń denesi tabyldy. Oqıǵa oryn alǵan ýaqytta balalardyń ata-anasy túngi jumysta bolǵan.