Memleket basshysynyń tapsyrmasyna sáıkes medısınalyq kómektiń sapasy men qoljetimdiligin jaqsartý jumystary úshin 3 jyldyq kezeńge (2019-2021 jyldar) shyǵyndardyń qajetti kólemi 158,8 mlrd. teńgeni quraǵan. Bul týraly Densaýlyq saqtaý vıse-mınıstri A.Soı Úkimet otyrysynda habarlady.
Memleket basshysy 2018 jylǵy 30 qańtarda Qazaqstan Respýblıkasy Úkimetiniń keńeıtilgen keńesinde medısınalyq kómektiń sapasy men qoljetimdiligin jaqsartý jónindegi jumysty jalǵastyrýdy tapsyrdy.
Osyǵan oraı, 3 jyldyq kezeńge (2019-2021 jyldar) shyǵyndardyń qajetti kólemi 158,8 mlrd. teńgeni quraǵan. Onyń ishinde 156,5 mlrd teńge materıaldyq tehnıkalyq jaraqtandyrýǵa jáne kúrdeli jóndeýge jumsalmaq.
Al 2,3 mlrd teńge jyljymaly medısınalyq keshenge jáne densaýlyq poezdarynyń qyzmet kórsetýine jumsalady eken.
«800 birlik jedel járdem avtomobılderin jáne reanımobılderdi satyp alýǵa somasy 24,5 mlrd teńgeni qurady, onyń ishinde 293 birlik reanımobıl jáne 507 avtokólik jelilik brıgadalarǵa jumsalady» deıdi Densaýlyq saqtaý vıse-mınıstri A.Soı.
Sonymen qatar, qazirgi ýaqytta qala jáne aýdan ortalyqtary úshin ótimdiligi joǵary jedel járdem mashınalarynyń tehnıkalyq sıpattamalary ázirlenip jatyr.
Sondaı-aq, óńirlerdi jyljymaly medısınalyq keshendermen jabdyqtaý úshin aýyldarda medısınalyq tekserý júrgizý úshin respýblıkanyń 4 óńiri (Atyraý, Qostanaı, Qyzylorda jáne Túrkistan oblystary) úshin jalpy somasy 2,5 mlrd teńgege 18 jyljymaly medısınalyq keshen satyp alý josparlanǵan.
«Odan bólek oblystardyń jáne Respýblıkalyq mańyzy bar qalalardyń ákimderi aýdandyq aýrýhanalar men MSAK obektilerin 3 jyl ishinde eń tómengi standarttarǵa sáıkes medısınalyq tehnıkamen tolyq jaraqtandyrýdy qamtamasyz etýi qajet. Osy maqsattarǵa qajettilik barlyǵy 129,5 mlrd teńgeni quramaq. Onyń ishinde tehnıkalyq jaraqtandyrýǵa - 77,2 mlrd teńge, al kúrdeli jóndeýge – 52,3 mlrd teńge.
О́ńirler bólinisindegi túpkilikti qajettilik túgendeý qorytyndylary boıynsha aıqyndalatyn bolady» dedi Densaýlyq saqtaý vıse-mınıstri A.Soı.