22 aqpanda Parlament Senatynyń depýtaty, Qazaqstan Respýblıkasyndaǵy bala quqyqtary jónindegi ýákil Sáýle Aıtpaeva quramyna Zonthofen qalasyndaǵy ýchaskelik sot tóraǵasynyń birinshi orynbasary Krıstıan Roh, jastar isi jónindegi mekemeniń ókili, áleýmettik salanyń qyzmetkeri Kerstın Bekmann engen Germanııa delegasııasymen kezdesti. Júzdesýge elimizdiń Joǵarǵy sotynyń sýdıasy Ulbosyn Súleımenova qatysty.
S.Aıtpaeva kezdesý barysynda Parlament Senatynyń zań shyǵarý qyzmeti týraly áńgimeledi. Senator bizdiń elimizde júzege asa bastaǵan «Otbasylyq sot» jobasy týraly habardar etip, ótken jyldyń qarasha aıynda Joǵarǵy sottyń jalpy otyrysynda balalar quqyqtaryn qorǵaý jóninde birqatar qaýly qabyldanǵanyn atap ótti.
Meımandar óz kezeginde Germanııadaǵy otbasylyq sottyń tájirıbesimen bólisti. Olar otbasylyq quqyq ereksheligine, otbasy jáne kámeletke tolmaǵandardyń isteri jónindegi sot qyzmetteri arasyndaǵy aıyrmashylyqtarǵa toqtaldy. Júzdesýge qatysqandaı balalardyń quqyqtaryna qatysty daýlardy sheshý týraly pikir almasty.
S.Aıtpaeva kámeletke tolmaǵandarǵa qatysty ádilettilik máseleleri boıynsha halyqaralyq tájirıbe almasýdyń mańyzdylyǵyn atap ótip, kezdesýge alǵysyn bildirdi jáne eki el arasyndaǵy syndarly yntymaqtastyq jalǵasatynyna senim bildirdi.