Qaraǵandy oblysynda kópbalaly analarǵa arnalǵan áleýmettik kómek mólsheri artady. Bul týraly oblys ákimi Erlan Qoshanov esepti kezdesý barysynda aıtty.
– Oblystyq bıýdjettiń 50% áleýmettik salaǵa baǵyttalady. Memleket basshysynyń tapsyrmasyn oryndaý aıasynda biz memlekettik qoldaý sharalarynyń sheńberin ulǵaıtý jóninde sheshim qabyldadyq, – dep atap ótti ol.
Osyǵan oraı ol kópbalaly jáne az qamtylǵan otbasylardyń jaǵdaıyn jaqsartý úshin arnaıy jasalǵan 10 qadamdy atap ótti. Iаǵnı, kópbalaly analar qosymsha kómek alatyn bolady. Mysaly, 1 maýsymnan bastap olar qaladaǵy qoǵamdyq kólikterde tegin júredi. Kópbalaly otbasylardyń tómengi synyptarda oqıtyn balalary tegin ystyq tamaqpen qamtamasyz etiledi. Sondaı-aq, balabaqsha aqysyna 50% jeńildik jasalady.
Budan bólek, kópbalaly otbasylardyń balalary mýzykalyq jáne kórkemóner mektepterinde, sport úıirmelerinde tegin jattyǵa alady. Jazda balalar mektep janyndaǵy lagerlerge ornalastyrylatyn bolady.
Budan bólek,óńir basshysy oblystyq bıýdjetten kolledjderde oqytý úshin 5,5 mlrd teńge bólinetinin aıtty. Munyń ózi 8 myń grant bólýge múmkindik beredi.
Sonymen qatar, kópbalaly analarǵa jeke isin ashý úshin 200 grant bólinedi. Olar úshin bıznes-ınkýbator qurylady. Buǵan qosymsha, otbasyn qoldaý jóninde ortalyq ashý josparlanǵan. Bul jerde olarǵa mamandar men psıhologtar kómek beredi.
Qaırat ÁBILDA,
«Egemen Qazaqstan»
Qaraǵandy