BUU-nyń Nıý-Iorktegi shtab-páterinde Qazaqstannyń, Maltanyń jáne Fransııanyń tóraǵalyǵymen qarýly qaqtyǵystarǵa qatystyrylǵan balalardy qaıta ıntegrasııalaý boıynsha BUU Dostary tobynyń birinshi kezdesýi bolyp ótti.
Kezdesýge 40-qa jýyq BUU múshe-memleketteriniń, BUU Balalar qorynyń (IýNISEF), Dúnıejúzilik banktiń jáne túrli úkimettik emes uıymdardyń ókilderi, sonyń ishinde Ýgandada jáne Ońtústik Sýdanda balalardy qaıta ıntegrasııalaý máselerimen aınalysatyn uıymdy basqaratyn amerıkandyq akter, «Oskar» júldesiniń ıegeri Forest Ýıtaker qatysty.
«Qazaqstan bizdiń eń qundy baılyǵymyz bolyp tabylatyn balalardyń, ásirese qarýly qaqtyǵystardan zardap shekken uldar men qyzdardyń qaýipsizdigi men ál-aýqatyn qamtamasyz etýge baǵyttalǵan barlyq halyqaralyq bastamalardy qoldaıdy», - dep atap ótti Qazaqstannyń BUU janyndaǵy Turaqty ókili Qaırat Omarov óz sózinde. Ol sondaı-aq, balalardy reıntegrasııalaýdyń jańa tásildemesi olardyń qalypty ómirge sátti oralýyna ǵana emes, balalarǵa ózderiniń qaýymdaryna «oń ózgeristerdiń ókilderi» retinde qyzmet etýge múmkindik beredi dep atap ótti.
Qazaqstan, Malta jáne Fransııa birlesip basqaratyn Balalardy reıntegrasııalaý jónindegi BUU dostary toby 2018 jyldyń qyrkúıeginde BUU-da qurylǵan Reıntegrasııa boıynsha jahandyq koalısııanyń quramdas bóligi bolyp tabylady. Koalısııanyń túpki maqsaty – qarýly qaqtyǵystardan zardap shekken balalardy, onyń ishinde terorıstik uıymdarmen jaldanǵan burynǵy ásker balalardy, ádettegi ómirge qaıtarýdyń jańa, tıimdi ádisterin ázirleý.
Bul máseleni sheshý úshin Koalısııa osy másele boıynsha zertteý júrgizý úshin búkil álemniń tanymal ǵalymdary men sarapshylaryn jumysqa tartty. Sonymen bir mezgilde múshe memleketter men BUU agenttikteri arasynda aqparat pen tájirıbe almasý júzege asyrylýda.
Koalısııa jumysynyń nátıjeleri 2019 jyldyń qyrkúıeginde Nıý-Iorkte BUU Bas Assambleıasynyń 74-sessııasy sheńberinde joǵary deńgeıdegi is-shara barysynda álemdik qoǵamdastyqqa usynylatyn bolady.
Qazaqstan qaqtyǵys jaǵdaıyndaǵy balalardyń jaǵdaıyn jeńildetý, olardy qaıta ıntegrasııalaý jáne ońaltý, sondaı-aq bilim men densaýlyq saqtaýǵa qoljetimdilikti qamtamasyz etýge baǵyttalǵan sharalardy ilgeriletýge úlken mán beredi. Elimiz BUU Qaýipsizdik Keńesine 2017-2018 jyldardaǵy músheligi barysynda Keńestiń jáne onyń qosalqy organdarynyń osy saladaǵy qyzmetine belsene qatysty. Oǵan qosa, Qazaqstan Aýǵanstandaǵy balalardy qaıta ıntegrasııalaý jáne ońaltý úshin IýNISEF-pen birlesken jobalardy júzege asyrýǵa qarajat bóledi.
Qazaqstannyń tóraǵalyǵymen ótetin Dostar tobynyń kelesi kezdesýi 2019 jyldyń sáýir aıyna josparlanǵan. Kezdesý barysynda balalardy qaıta ıntegrasııalaý jónindegi jobalardy qarjylandyrý mehanızmderiniń tıimdiligin arttyrý máseleleri talqylanady.