Táýelsiz Qazaqstannyń Tuńǵysh Prezıdenti Nursultan Nazarbaevtyń prezıdenttik ókilettigin toqtatý jónindegi málimdemesin úlken tolǵanyspen tyńdadym. Bul málimdeme táýelsiz elimiz úshin úlken tarıhı oqıǵa boldy.
Qazaqstannyń táýelsizdik jyldarynda qol jetkizgen barlyq tabystary, asqan asýlary, shyqqan belesteri Nursultan Nazarbaevtyń tikeleı basshylyǵymen júzege asyryldy dep senimmen aıta alamyn. Naqtylaı aıtqanda, Ata Zańymyzdyń qabyldanýy, Qarýly Kúshterimizdiń qurylýy, shekaramyzdyń shegendelýi, jańa Astananyń salynýy, ekonomıkamyzdyń órkendeýi, shettegi qandastarymyzdyń atajurtqa oralýy jáne basqa da sheshimin tapqan ıgilikti ister týraly sóz qozǵaǵanda sanamyzda Nursultan Nazarbaevtyń eren eńbegine toqtalmaý múmkin emes.
Budan bólek, elimizdiń ıadrolyq qaýipsizdikti nyǵaıtý salasynda kóshbasshy el retinde tanylýy, halyqaralyq jáne aımaqtyq uıymdardyń jumysyna belsendi aralasýy, EQYU-ǵa, IYU-ǵa tóraǵalyq etýimiz, TMD-da alǵashqy bolyp EKSPO-2017 kórmesiniń ótkizilýi Tuńǵysh Prezıdentimizdiń tikeleı bastamalarymen júzege asyrylǵany anyq.
Táýelsizdik jyldarynda Qazaqstannyń básekege qabiletti 50 eldiń qataryna qosylýy, el ekonomıkasyna qyrýar ınvestısııa quıylǵany, halyqtyń ál-aýqatynyń artýy, jumyssyzdyqtyń qysqarýy, jas urpaqty ýaqyt talabyna saı tárbıelep, bilim nárimen sýsyndatý, aýyldardy qoldaý sharalary Nursultan Nazarbaev júrgizgen saıasattyń arqasynda júzege asyryldy.
Shettegi qandastarymyzdy atamekenge shaqyrýy nátıjesinde 1 mıllıonnan astam qazaqtyń elge qonys aýdarýyn táýelsizdik tabystarynyń biregeıi desek, qatelespeımiz. Nursultan Nazarbaevtyń osy jumysty uıymdastyrýdaǵy eńbegin barsha qazaq biledi.
Árıne Tuńǵysh Prezıdentimizdiń Qazaqstan úshin, óziniń týǵan halqy úshin atqarǵan qyzmetin shaǵyn maqalada qamtyp shyǵý qıyn. Nursultan Nazarbaevtyń óz eline jasaǵan qyzmeti táýelsiz elimizdiń jasampaz tarıhynyń ajyramas bóligi bolyp qalatyny sózsiz.
Álemniń eń damyǵan 30 eliniń qataryna qosylýdy maqsat etken Qazaqstannyń odan ári damýyna barlyq alǵysharttardy qalyptastyrǵan elimizdiń Tuńǵysh Prezıdenti – Elbasy aldaǵy ýaqytta da óz halqy úshin aıanbaı eńbek ete bermek. Bul barsha qazaqstandyqtar úshin óte mańyzdy.
Qýanysh AITAHANOV,
qoǵam qaıratkeri