Alǵashqy baspasóz konferensııasynda AQSh elshisi Djýlı M. Stafft optımıstik kózqaras bildirip, AQSh pen Qazaqstan arasyndaǵy qatynastardy tarıhtaǵy eń joǵary deńgeıge jetken seriktestik dep baǵalady. Ol tehnologııa, energetıka jáne dıplomatııa salalaryndaǵy jańa yntymaqtastyq baǵyttary ekijaqty qatynastardy tereńdete túsetinin atap ótti, dep habarlaıdy Egemen.kz.
13 aqpanda AQSh Elshisi Djýlı M. Stafft baspasóz konferensııasyn ótkizip, jýrnalısterdiń suraqtaryna jaýap berdi. Jańadan taǵaıyndalǵan elshi kirispe sózinde AQSh-pen tarıhı deńgeıdegi ekijaqty qarym-qatynas ornatýǵa áleýeti eń úlken el – Qazaqstan ekenin aıtty.
«Astanaǵa bir aı buryn keldim. Aýa raıy sýyq bolǵanymen, qazaqstandyqtardyń, Qazaqstan úkimetiniń, elshiliktegi áriptesterdiń yqylasy erekshe jyly boldy. Otbasymmen birge ózimizdi óz úıimizdegideı sezinip jatyrmyz. Amerıka Qurama Shtattary – Qazaqstanmen resmı dıplomatııalyq qarym-qatynas ornatqan alǵashqy memleket. Otyz bes jyldaı biz ózara qurmetke, ortaq qundylyqtarǵa jáne jaqsy álemdi birge qurý ıdeıasyn negizge alǵan seriktestik ornattyq. Qazaqstannyń egemendigine degen bizdiń adaldyǵymyz berik. Qazaqstan táýelsizdik alǵannan beri birge qol jetkizgen jetistikterimiz ben damýymyzdy maqtan tutamyz», dedi elshi hanym.
Onyń sózinshe, AQSh pen Qazaqstan arasyndaǵy qarym-qatynastar eki el tarıhyndaǵy eń ońtaıly kezeńde tur. Sonymen birge ol eki eldiń kóshbasshylary álemdik arenada bir-birimen tyǵyz baılanysta ekenin atap ótti.
«Bizde kompanııalar arasyndaǵy buryn-sońdy bolmaǵan kommersııalyq yntymaqtastyq bar, ınvestısııalar eki jaqqa da baǵyttalyp jatyr. Onyń ústine eki eldiń mádenı baılanystary da damyp jatyr. Meniń elshi retindegi mindetim – osy múmkindikterdi paıdalanyp, AQSh pen Qazaqstan arasyndaǵy damý men órkendeýdi qamtamasyz etý», dedi ol.
Elshiniń sózinshe, qazirge deıin elimizde AQSh-tyń AI kompanııalarymen 3,7 mıllıard dollarlyq kelisimder jasalǵan. Ári ol elimizdegi jas býyn, óskeleń urpaq óte qabiletti, shyǵarmashyl da aqyldy dep baǵalady.
AQSh elshisi: Qazaqstan Prezıdentine senim gramotasyn tapsyrǵanyma óte qýanyshtymyn
Elshi osyǵan deıin 22 000 qazaq stýdenti AQSh-ta bilim alǵany týraly da sóz qosty.
«Mádenı dıplomatııa eki eldiń qarym-qatynasyn nyǵaıta ala ma degen suraǵyńyz men úshin óte ózekti taqyryp, óıtkeni ótken qarasha aıynda Aqúıde Prezıdent Tramp pen Prezıdent Toqaev mádenı dıplomatııa jáne ony AQSh pen Qazaqstan arasynda qalaı keńeıtýge bolatyny týraly sóılesti. Meniń salamdaǵy dástúrli dıplomatııada mádenı dıplomatııa týraly aıtsam, ádette murajaılar, óner, mýzyka jáne eki el arasyndaǵy tarıhı mádenı muralardy bólisý týraly sóz bolady. Biraq eń mańyzdysy – buryn aıtyp kelgen tájirıbe almasý baǵdarlamasy. Mysaly, ótken jyly AQSh-ta bilim alǵan 3000 qazaq stýdenti osynyń dál mysaly. Siz de solardyń birisiz. Qazaqstan táýelsizdik alǵannan beri 22000 qazaqstandyq stýdent nemese basqa mamandar AQSh-ta almasý baǵdarlamalaryna qatysqan, olar AQSh tarapynan qarjylandyrylǵan», dedi elshi Stafft «Egemen Qazaqstan» tilshisiniń suraǵyna jaýap berip.
Kezdesýde elshi Amerıka Qurama Shtattary Qazaqstanmen resmı dıplomatııalyq qatynas ornatqan alǵashqy memleketterdiń biri ekenin atap ótip, eki el 35 jyl ishinde ózara qurmetke, ortaq qundylyqtarǵa jáne turaqty álem qurý ıdeıasyna negizdelgen seriktestik qalyptastyrǵanyn aıtty. Ol Vashıngtonnyń Qazaqstannyń egemendigine degen qoldaýy ózgermeıtinin atap ótip, táýelsizdik jyldaryndaǵy eldiń damýyn joǵary baǵalady.
Memleket basshysy AQSh pen Bolgarııa elshilerinen senim gramotalaryn qabyldady
Stafft hanymnyń aıtýynsha, ekijaqty qatynastar Donald Trump pen Qasym-Jomart Toqaev arasyndaǵy tyǵyz baılanystarmen de nyǵaıa túsýde. Bul baılanystar Qazaqstannyń óńirlik ári jahandyq deńgeıdegi róliniń artyp kele jatqanyn kórsetedi.
«Bul yntymaqtastyq odan ári jalǵasady. Biz qaýipsizdik, mádenıet jáne saýda baılanystaryn tereńdete otyryp, beıbit ári órkendegen álem qurýǵa umtylamyz», dedi ol.
Vıza máseleleri keıbir azamattardy alańdatqanymen, elshi AQSh vızasyna ótinish berýshilerdiń basym bóligi oń jaýap alatynyn atap ótti. Sonymen qatar stýdenttik almasýlar ósip kele jatqanyn, ótken jyly AQSh-ta oqıtyn qazaqstandyq stýdentter sany rekordtyq deńgeıge jetkenin eske saldy. Energetıkalyq ınfraqurylym men munaı jobalaryna qatysty daýlar týraly suraqqa jaýap bergen elshi ınvestısııa tartý úshin ashyq ári turaqty iskerlik orta mańyzdy ekenin aıtty. Daýlardy arbıtraj arqyly sheshý ınvestor senimin saqtaýǵa kómektesetinin jáne sondaı-aq ol munaı tasymaldaý ınfraqurylymynyń jahandyq energetıkalyq naryq úshin qaýipsiz ári senimdi bolýynyń mańyzyn atap ótti. Elshi AQSh Qazaqstandaǵy konstıtýsııalyq reformalar men BAQ erkindigi máselelerin muqııat baqylap otyrǵanyn aıtty. Ol sóz bostandyǵy – amerıkalyq qundylyqtardyń negizgi tirekteriniń biri ekenin jetkizdi.
Sonymen qatar AQSh dıplomattarynyń qazaq tilin úırenýge qyzyǵýshylyǵy artyp kele jatqanyn, bul jastar arasynda memlekettik tildiń keńinen qoldanylýymen baılanysty ekenin aıtty. Sóz sońynda elshi otbasymen birge Qazaqstandy aralap, onyń tabıǵatyn kórip, halqymen jaqynyraq tanysýdy asyǵa kútetinin aıtty. Onyń pikirinshe, Vashıngton men Astana arasyndaǵy seriktestiktiń bolashaǵy tek geosaıasat pen saýdaǵa ǵana emes, ınnovasııa, mádenı túsinistik jáne jańa býynnyń áleýetine de baılanysty bolmaq.