Soltústik Qazaqstan oblysynyń týmasy, «Otan» ordeniniń ıegeri Arystan Junysov Elbasynyń atqarǵan isterin aıtyp, qabyldaǵan sheshimine qatysty pikir bildirdi.
Elbasy Nursultan Nazarbaevtyń memleketimizdiń asa mańyzdy tarıhı sátinde halyqqa qaırylyp, úndeý jarııalaýy otbasymyz úshin kútpegen sheshim bolǵanyn jasyrmaımyn. Shyny kerek, bastapqyda sener-senbesimizdi bilmeı bir-birimizge qaraǵan kúıi daǵdaryp qalǵanymyz ras. Kóńilimizde qımastyq sezim paıda bolyp, tipti kelinshegim kóziniń jasyna erik berdi. Men bolsam Nursultan Ábishulymen tanap basynda alǵash kezdesken kezimdi, saıası erik-jigerge toly suńǵyla saıasatkerligimen, iske myǵymdylyǵymen, ýádege beriktigimen, qalyń buqarany sońyna ilestire biletin kóshbasshylyq bolmysymen tánti etken qasıetterin eske aldym. «Qazaqstandyqtardyń ál-aýqatynyń ósýi: tabys pen turmys sapasyn arttyrý» Joldaýynda mynandaı joldar bar: «Biz aýyldyq jerlerdiń áleýmettik ortasyn jańǵyrtýǵa kirisýimiz qajet. Buǵan arnaıy «Aýyl – el besigi» jobasynyń iske qosylýy septigin tıgizedi. Bul joba arqyly óńirlerdegi eńbekke qatysty ıdeologııany ilgeriletýdi qolǵa alý kerek». Kez kelgen istiń baǵasy salystyrý arqyly bilinedi. Úndeýde aıtylǵandaı Keńes Odaǵy qulap, saıasatymyz ben ekonomıkamyz shatqaıaqtap qalǵanda el tizginin Nursultan Ábishulyna senip tapsyrdyq. Tańdaýdan qatelespegenimiz qudiretti ýaqyttyń enshisinde. Mysaldy alystan izdemeıik, bir kezderi taraýdyń az-aq aldynda turǵan Bekseıit, Mińgeser aýyldarynyń bet-beınesi búginde adam tanymastaı ózgergen. Yrysymyzdyń molaıyp, tabysymyzdyń eselene túsýine Elbasymyzdyń kóregendi aýylsharýashylyq saıasaty arqyly jetkenimiz aıdaı shyndyq. Eginshilikpen birge mal sharýashylyǵymen de aınalysamyz. Jumyssyz júrgen jastar joqtyń qasy. Jyl ótken saıyn eldi mekenderdiń irgesi qalyńdap, turmysynyń sapasy artyp keledi. Búgingi tańda seriktestikte 235 adam jumys isteıdi. Bekseıit aýylyndaǵy orta mektepke sport zaly salynyp, bilim berý mekemesiniń ekiqabatty ǵımaratyna jańa plastıkalyq terezeler ornatyldy. Zamanaýı shaǵyn ortalyq, balalarǵa arnalǵan jazǵy oıyn-saýyq alańy, jastar úıi boı kóterdi. Eldi mekenniń kósheleri jaryqtandyrylǵan. Endi sý taratý jelilerin salý josparlanǵan. Qazaqylyqtyń qaınar bulaǵy – qasıetti ortanyń qaımaǵy buzylmaı saqtalyp qalýyna qol ushyn berip, aýyldyqtardyń turmys-tirshiligin únemi nazarda ustaǵan Prezıdentimizge biz shynaıy rızamyz!
Elimizdi otyz jyl boıy úzdiksiz basqaryp, Qazaqstandy búkil álemge tanytyp, moıyndata bilý kez kelgen lıderdiń qolynan kelmesi anyq. Prezıdent retindegi ókilettigin toqtatý týraly sheshimi tóbemizden jaı túskendeı bolsa da, erteńge, halyqqa, jastarǵa degen senimi durys jolmen kele jatqanymyzdy aıǵaqtaıdy. Myqty ulttyq memleket quryp, qazaqstandyqtardyń bir-birine degen qylaýsyz dostyǵyn sútteı uıyta bilgen Elbasymyz qashanda bizben birge!