Shymkentte jańadan elimizde balamasy joq biregeı medısınalyq qurylǵysy bar ortalyq ashyldy. Búgin shym shaharǵa is-saparmen kelgen Qasym-Jomart Toqaev zamanaýı úlgide ashylǵan klınıkanyń jumysymen tanysty.
Tórt qabatty ǵımaratta ornalasqan «MEDIKER 4K» ortalyǵynda turǵyndarǵa medısınalyq qyzmettiń barlyq túri kórsetiledi. Klınıkada sondaı-aq alǵashqy sporttyq medısına ortalyǵy jumys isteıdi. Onda kásipqoı sportshylar daıyndyq pen ońaltý prosesterin óte alady. Zamanaýı úlgide ashylǵan klınıka jetekshileri táýligine 500-ge deıin adam qabyldaı alamyz dep otyr. Al, mindetti áleýmettik medısınalyq saqtandyrý (MÁMS) sheńberinde memlekettik-jekemenshik áriptestik baǵdarlamasy boıynsha 30 000 adamǵa deıin qyzmet kórsetedi. Munda naýqastarǵa joǵary jaılylyq jaǵdaıynda dınamıkalyq baqylaý men derbestendirilgen tásildi júzege asyrýǵa múmkindik beretin dıagnostıkalyq jáne emdik qyzmetter kesheni qamtylady.
MEDIKER kompanııalar tobynyń barlyq medısınalyq ortalyqtaryn biryńǵaı sıfrlyq keńistikke biriktiretin jeke medısınalyq aqparattyq júıesi bar ekenin atap ótken jón. Aıtalyq, sıfrlyq tehnologııalardyń arqasynda, mysalǵa, Astanadaǵy MEDIKER dárigerleri Shymkent qalasyndaǵy áriptesterine qashyqtyqtan keńes bere alady.
Sonymen qatar, «MEDIKER 4K» klınıkasynyń bazasynda Ulttyq Olımpıada komıtetimen, sporttyq jekpe-jek Konfederasııasymen jáne sporttyq medısına Federasııasymen tyǵyz yntymaqtastyq aıasynda sporttyq medısına ortalyǵy ashylǵan. Aldyńǵy qatarly sportshylar, halyqaralyq birinshilikter men Olımpıada oıyndarynyń chempıondary men júldegerleri qalpyna keltirý jáne fızıoterapııalyq em alady. Ortalyqtyń negizgi baǵyty - balalarǵa qamqorlyq kórsetý. Astana, Almaty, Atyraý sııaqty qalalarda pedıatrııalyq kómek kórsetý salasynda kópjyldyq jumys tájirıbesi bola otyryp, MEDIKER kompanııasy Shymkent qalasynda da qyzmet kórsetý aımaǵyn keńeıtken. Klınıkada kópjyldyq tájirıbesi bar 3 000-ǵa jýyq dáriger men medısına mamandary jumys isteıdi.