Eldiń ál-aýqatyn kásipkerlik kóteredi

Osyǵan oraı partııanyń bastamasymen Memlekettik baǵdarlamalar men reformalardy júzege asyrýdyń tıimdiligin baǵalaý jáne monıtorıng júr­gizý ortalyǵy quryldy. Atal­ǵan ortalyqtyń alǵashqy otyry­sy ótip, onda bıznesti qol­daýǵa jáne damytýǵa arnalǵan «Bıznestiń jol kartasy-2020» memlekettik baǵdarlamasynyń júzege asyrylý barysy týraly esep tyńdaldy. Otyrysqa Nur Otan partııasy Tóraǵasynyń birinshi oryn­basary Máýlen Áshimbaev, Ult­tyq ekonomıka mınıstri Rýs­lan Dálenov, «Atameken» UKP Basqarma tóraǵasy Aby­laı Myrzahmetov, Parla­ment Májilisiniń depýtattary, «Damý» kásipkerlikti qol­daý qorynyń ókilderi, Nur Otan partııasy janyndaǵy kásip­ker­likti qoldaý jónindegi respýb­lı­kalyq qoǵamdyq keńestiń músheleri, bıznes-qaýymdastyq ókilderi men belgili sarapshy mamandar qatysty. Odan bólek beıne-konferensııa baılanysy arqyly barlyq oblys pen Elorda, Almaty jáne Shymkent qalalary ákimderiniń orynbasarlary, jergilikti kásipkerler jáne joǵaryda atalǵan qoǵamdyq keńestiń aımaqtyq ókilderi de qatysty. Is-sharany Nur Otan partııasy Memlekettik baǵdarlamalar men reformalardy júzege asyrýdyń tıimdiligin baǵalaý jáne monıtorıng júrgizý ortalyǵynyń dırektory Rahym Oshaqbaev júrgizip otyrdy. Sóz basynda Nur Otan par­tııasy Tóraǵasynyń birinshi oryn­basary Elbasynyń kezekti XVIII sezde bergen tapsyrma­syna nazar aýdaryp, ony oryn­daý úshin partııa júıeli ju­my­s­ty bastap ketkenin aıtty. – Elbasy mańyzdy mem­le­kettik baǵdarlamalardyń jú­ze­ge asyrylý barysyna qoǵam­dyq baqylaý júrgizý jumys­taryn kúsheıtýdi tapsyrdy. Bul jumystardyń maqsaty par­tııanyń memlekettik organdardan esep talap etý emes, kerisinshe baǵdarlamalardy tıimdi ári ýaqtyly júzege asy­rýǵa yqpal etip, elimizdiń stra­tegııalyq qujattarynda kórsetilgen tıisti sharalardy qolǵa alý. Osyndaı tyńdaý­lar­dyń «Bıznestiń jol kartasy-2020» baǵdarlamasynan bastalǵany da tegin emes. О́ıt­keni el ekonomıkasy men halyqtyń ál-aýqaty kásipker­lik­pen tikeleı baılanysty, – dedi M.Áshimbaev. «Bıznestiń jol karta­sy-2020» memlekettik baǵdar­la­masynyń basty maqsa­ty – aımaqtyq kásipkerliktiń turaqty ári teńgerimdi ósýin qam­tamasyz etip, jumys oryndaryn saqtaý jáne jańa qyzmet oryndaryn ashý. Elbasynyń tikeleı bastamasymen qolǵa alynǵan bul baǵdarlama 2010 jyldan beri júzege asyrylyp keledi. Tuńǵysh Prezıdentimizdiń ót­ken jyldyń qazan aıyndaǵy Qazaqstan halqyna arnaǵan Joldaýynda baǵdarlamanyń qoldanylý merzimin 2025 jylǵa deıin uzartý kerektigin aıtyp, tıisti oryndarǵa naqty tapsyrma bergeni belgili. Qazirgi tańda osy baǵytta aıtarlyqtaı jumystar qolǵa alynyp, ıgi nátıjelerin berýde. Bul jóninde Ulttyq eko­nomıka mınıstri R.Dá­lenov keńinen aıtyp berdi. Onyń sózine qaraǵanda, baǵdar­lamanyń áleýmettik-ekonomı­kalyq áseri zor. Atap aıtqanda, 2015-2018 jyldar aralyǵynda baǵdarlama aıasynda 210,1 mlrd teńge qarajat bólinip, sonyń nátıjesinde 13 myńnan astam shaǵyn jáne orta kásipkerlikke qoldaý kórsetilgen. Odan bólek, jyl saıyn 10 myń jańa jumys orny ashylyp, jylyna 20 myń azamat kásipkerliktiń qyr-syry týraly oqytý kýrsynan ótken. Sondaı-aq osy jyldar ishinde baǵdarlama arqyly orta eseppen 3,3 trln teńgeniń ónimi óndirilip, qazynaǵa jylyna 175 mlrd teńge salyq tólengen. О́z kezeginde «Atameken» UKP Basqarma tóraǵasy A.Myr­­zahmetov atalǵan baǵ­dar­­­la­ma­nyń otandyq kásip­ker­lik­­tiń damýyna tyń serpin ber­ge­nin aıtty. Onyń aıtýynsha, «Atameken» kásipkerler pa­latasy 2015 jyldan beri baǵ­darlamanyń tórtinshi baǵyty – ká­sipkerlikti qarjysyz qol­daý sharalarynyń basty úıles­tirýshisi bolyp keledi. Soǵan sáıkes ulttyq kásipkerler palatasy qoldanystaǵy bıznes­ke qyzmettik qoldaý kórsetý, mo­no jáne shaǵyn qalalar men aýdan ortalyqtaryndaǵy ká­sipkerlerge memlekettik qol­daý týraly aqparattyq túsindirý jumystaryn júrgizý, «Bıznes-mektep», «Iskerlik baılanys­tar», «Aǵa senorlar», «Bıznes nasıhat» sııaqty naqty 6 baǵyt boıynsha jumys júrgizýde. Al Nur Otan partııasy Mem­le­kettik baǵdarlamalar men re­for­malardy júzege asyrýdyń tıim­diligin baǵalaý jáne monıtorıng júrgizý ortalyǵynyń dırektory Rahym Oshaqbaev «Bıznestiń jol kartasy-2020» baǵdarlamasyn júzege asyrý kezindegi keıbir olqylyqtarǵa toqtaldy. Sonymen qatar is-sharada Májilis depýtaty Albert Raý, Shym­kent qalasy áki­mi­niń oryn­­basary Danat Jý­mın, «Ká­sip­­kerler forýmy» qaýym­das­­­ty­ǵynyń tóraǵasy Raımbek Ba­talov, «Azala Textile» JShS dırektory Gúl­nár Sadyqbekova jáne taǵy bas­qa birqatar maman­dar sóz alyp, baǵdarlama aıasyn­da atqa­rylyp jatqan ju­mys­tardyń nátı­je­liligin arttyrýǵa qatysty oılarymen bólisti. Is-sharany qorytyndylaǵan M.Áshimbaev bul partııanyń Elbasynyń qoǵamdyq baqy­laý­dy kúsheıtý jónindegi tapsyrmasyn oryndaý jumystarynyń basy ǵana ekenin aıtyp, aldaǵy ýaqytta osyndaı tyńdaýlardyń jalǵasatynyn jetkizdi. Sondaı-aq ol búgingi talqylaýdyń elimizdegi bıznes pen shaǵyn jáne orta kásipkerlik salasynda birqatar máseleniń bar ekenin kórsetip bergenine kóńil bóldi. Budan bólek, partııa Tóraǵa­synyń birinshi orynbasary esepke alý, statıstıka júrgizý jumystaryn jetildirý jaıyna toqtalyp, sońynda  partııanyń memlekettik baǵdarlamalardyń tıimdiligin arttyrýǵa múddeli barlyq tarappen jumys isteýge daıyn ekenin aıtyp, búgingi tal­qylaýdyń nátıjesinde Úki­metke arnaıy usynystar joldanatynyn jetkizdi. Aıta keteıik, partııa janynan jańadan qurylǵan Mem­le­kettik baǵdarlamalar men reformalardy júzege asyrýdyń tıimdiligin baǵalaý jáne monıtorıng júrgizý ortalyǵynyń ne­gizgi maqsaty – Úkimet pen aza­­mat­tyq qoǵam arasynda tıimdi keri baılanysty qalyp­­tas­­tyryp, memlekettik baǵdar­la­malardyń tıimdiligin jáne ha­lyqtyń sodan kórip otyr­ǵan paı­dasyn anyqtaý. Soǵan baıla­nysty naqty jospar da­ıyn­dalǵan. Bul boıynsha jyl sońyna deıin 8 memle­ket­tik baǵdarlama men 4 ulttyq jo­ba qarastyrylmaq. Atalǵan ju­mystar jalpyǵa qoljetimdi túr­de júrgizilip, áleýmettik je­li­lerde tikeleı taratylady.