Sıfrlyq damý, qorǵanys jáne aeroǵarysh ónerkásibi mınıstri Asqar Jumaǵalıev Germanııanyń Qazaqstandaǵy Tótenshe jáne О́kiletti elshisi Tılo Klınnermen kezdesý ótkizdi. Bul týraly Sıfrlyq damý, qorǵanys jáne aeroǵarysh ónerkásibi mınıstrliginiń baspasóz qyzmeti habarlady.
Kezdesý barysynda taraptar qorǵanys ónerkásibi men sıfrlyq damý salasyndaǵy áriptestikti keleshekte nyǵaıta túsýdi talqylady.
«Bizdi Germanııanyń sıfrlandyrý, adamı kapıtaldy jáne ınnovasııalyq ekojúıelerdi damytýdaǵy ozyq tájirıbesi qyzyqtyrady. Sizderdiń atalǵan salalardaǵy jetistikterińizdi eskere otyryp, biz germanııalyq kompanııalardyń ekonomıkanyń barlyq sektory boıynsha, ásirese sıfrlandyrý salasynda áriptestik ornatý jónindegi usynystaryn qaraýǵa ázirmiz», dep atap ótti Asqar Jumaǵalıev.
Taraptar ózara tıimdi nátıjege qol jetkizýge múmkindik beretin ekijaqty qarym-qatynasty odan ári arttyrýdy qoldaıtyndaryn bildirdi.