Saltanatty jıyn Elbasy kitaphanasynyń dırektory Á.Rahymjanovtyń quttyqtaý sózimen ashyldy.
«Qazaqstan halqynyń alǵash ret óziniń Prezıdentin tańdaýy – tarıhı oqıǵalar arasyndaǵy eń mańyzdy sheshim. Qazirgi tańda elimiz jetken jetistikter men tabystardy Qazaqstan Respýblıkasynyń Tuńǵysh Prezıdenti – Elbasy N.Á.Nazarbaevtyń kópjyldyq eńbeginsiz elestetý múmkin emes. N.Nazarbaevtyń árbir batyl sheshimi – álemdik saıasatqa yqpal etýdiń taptyrmas úlgisi», degen ol prezıdent ınstıtýtynyń qalyptasýyna arnalǵan kórmege alǵash ret tolyq kólemde usynylǵan toptamalar jınaqtalǵanyn aıtty. Budan soń, L.N.Gýmılev atyndaǵy EUÝ rektory E.Sydyqov sóz sóıledi.
«Elimizdegi prezıdenttik ınstıtýt – táýelsiz eldiń ǵana emes, bárimizdiń taǵdyrymyz, barshamyzdyń qundylyǵymyz. Sonymen qatar ol jalpy halyqtyń bılikke, turaqty damý kepildigine degen senimi. 2019 jyldyń 19 naýryzynda Elbasy N.Á.Nazarbaev sanaly túrde prezıdenttik ókilettigin Parlament Senatynyń Tóraǵasy Qasym-Jomart Toqaevqa tapsyrdy. Osylaısha bılik transformasııasy júzege asty», dedi E.Sydyqov.
Uıymdastyrýshylardyń aıtýynsha, atalǵan kórme – Elbasy kitaphanasy qyzmetkerleriniń «Mýzeı jınaǵy» jobasy aıasyndaǵy ǵylymı-zertteý jumystarynyń nátıjesi. Munda qoıylǵan eksponattar eki bólimge toptastyrylǵan. Onyń birinshisi qurmet belgisi – asataıaqqa, al ekinshisi mantııalarǵa arnalǵan.
Atalǵan asataıaqtardy sheteldik delegasııa ókilderi men qazaq eliniń azamattary Tuńǵysh Prezıdent – Elbasynyń el damýyna qosqan orasan zor úlesi úshin qurmet retinde syıǵa tartqan. Ár asataıaq qazaq halqynyń qoldanbaly-sándik óneriniń erejesine saı jasalǵan. Qalyń kópshilikke alǵash ret tolyq kólemde usynylǵan toptamalar Tuńǵysh Prezıdent – Elbasy N.Nazarbaevtyń memlekettik qyzmetiniń bir qyrymen tanysýǵa múmkindik beredi.
Ekspozısııada usynylǵan asataıaqtar zergerlik jáne kórkem ónerdiń teńdessiz týyndylary. Olardyń ústi jartylaı asyl tastarmen kómkerilgen, ústińgi jaǵynda shar tárizdes nyshan bar. Bul nyshannyń rýhanı bastaý retindegi ózindik qasıeti bar dep eseptelinedi. Asataıaq qazaq halqynyń dástúrlerin eskere bezendirilgen. Máselen, «qoshqarmúıiz» halqymyzdyń birligin, molshylyq pen kelisimdi beıneleıdi.
Ekinshi kolleksııada sheteldik oqý oryndarynyń Elbasyna ár jyldary syılaǵan mantııalary jınaqtalǵan. Mantııalar álemniń ár qıyryndaǵy oqý oryndarynyń Qazaqstannyń Tuńǵysh Prezıdenti – Elbasynyń joǵary bilimniń ıntegrasııasy aıasyndaǵy asa zor tabystaryn tanýynyń aıǵaǵy. Kelýshiler nazaryna Japonııa, Koreıa, Qytaı, Vetnam, Kanada, Reseı elderi ýnıversıtetteriniń Tuńǵysh Prezıdent – Elbasyna bergen mantııalary usynylǵan.