Bıyl besinshi ret ótip jatqan jarys Jastar jylyna oraılastyrylǵan. Eki kúnge jalǵasatyn dop dodasynyń júlde qory – 3 mln teńge. «Otandastar qory» KEAQ jáne Dúnıejúzilik qazaqtar qaýymdastyǵy uıymdastyrǵan týrnırde bul joly Mońǵolııa, Reseı, О́zbekstan, Iran jáne Nur-Sultan, Almaty, Qaraǵandy, Aqtóbe qalalarynan kelgen 22 komanda oıyn kórsetýde. Týrnırdiń ashylý saltanatynda sóz alǵan «Otandastar qory» vıse-prezıdenti Maǵaýııa Sarbasov mundaı basqosýlardyń sheteldegi jastardyń atajurtyna kelip, eldi tanyp-bilýine, jastar ózara tyǵyz baılanys ornatýyna mol múmkindik beretinin atap ótti. Sondaı-aq ol sporttyq is-shara buqaralyq sportty damytyp, óskeleń urpaqty patrıottyq rýhta tárbıeleýge oń yqpal etetinin aıtty.
«Otandastar qory» qurylǵannan bastap mádenıet, sport, kásipkerlik sııaqty birneshe sala boıynsha qarym-qatynasty damytýǵa bilek sybana kirisip jatyr. Sońǵy jyldary kóptegen sebeptermen kósh saıabyrsyp qalǵany ras. Bul jarys bir jaǵynan qandastarymyzdyń tarıhı Otanyna oralýyna yqpal etse, ekinshi jaǵynan shette týyp-ósken qazaq jastarynyń elimizdiń jetistikterin tanyp-bilýine múmkindik syılaıtyny sózsiz», deıdi «Otandastar qory» Baılanys ortalyǵynyń jetekshisi Marat Toqsanbaev.
Jarysqa tórt jyldan beri úzbeı qatysyp kele jatqan bıylǵy Fýtzaldan ótken Mońǵolııa chempıonatynyń jeńimpazdary ekenin atap ótken jón. «Ulgii city» qurama komandasynyń bapkeri Ertaı Oraluly shákirtteri Mońǵolııa tarıhynda eń kóp gol soqqan aıaq dop sheberleri ekenin maqtanyshpen aıta kelip, bul joly «úzdik oıynshy» atanǵan 16 jastaǵy Balǵyn Kádirhanuly óner kórsetetinin jetkizdi.
О́zbekstan jastaryn bastap kelgen Erkebulan Elmuratov atalǵan týrnırge tuńǵysh ret qatysyp otyrǵandaryn aıtyp, qýanyshyn jasyrmady. «Jarysqa shaqyrý alǵanymyzǵa óte qýanyshtymyz. Mundaı basqosýlar bizdiń Qazaqstandy tanýymyzǵa, jańa dostar taýyp, baılanys ornatýymyzǵa úlken septigin tıgizeri sózsiz», deıdi ol.
Ala dop dodasynda shetelden kelip L.N.Gýmılev atyndaǵy Eýrazııa ulttyq ýnıversıtetiniń daıyndyq bóliminde oqyp jatqan jastar da baq synasýda. Komanda kapıtany Ramazan Asylbek «bul biz úshin úlken saıys. Jasymyz kishi bolsa da óz kúshimizdi synap kórýge keldik», deıdi.