Qyzylordada Keńester Odaǵynyń Batyry Táıimbet Kómekbaevty eske alýǵa arnalǵan sambo kúresinen halyqaralyq týrnır máresine jetti.
Jarysqa Reseı federasııasy, О́zbekstan, Tájikstan memleketterinen samboshylar keldi.
Bul týrnır 1996 jyldan beri ótkizilip keledi. 15 komandadan 150-ge jýyq balýan qatysqan týrnırdiń bási bólek.
– Ár sportshy óz deńgeıin bilý úshin osy týrnırge qatysýy kerek. О́ıtkeni, bul tek Azııa qurlyǵynda ǵana emes, álemdegi eń bedeldi týrnırlerdiń biri. Kilemde Álem, Azııa chempıondary men júldegerleri beldesedi. Al olarmen kúresý jas samboshylardyń mol tájirıbe jınaqtaýyna múmkindik beredi,-deıdi sambodan Azııa odaǵynyń birinshi vıse-prezıdenti Mahmýd Abdýllo.
Halyqaralyq týrnırdiń kórigin túıe balýandar básekesi qyzdyrdy. Alyptar aıqasynda qyzylordalyq Maqsat Isaǵabylov jeńiske jetip, bas júldege ıe boldy.