Keshtiń basty ereksheligi sol, bekzat óner jolynda júrgen úsh býyn ókilderi bas qosyp, «qulaqtan kirip, boıdy alar» nebir halyq ánderi men termelerdi shyrqady. Buqar jyraý, Maılyqoja, Bazar jyraý, Birjan sal, Jaıaý Musa, Aqan seri, Úkili Ybyraı sekildi qazaqtyń birtýar dúldilderiniń esimderi ardaqtalyp, kórermender óshkeni janyp, ólgeni tirilgendeı ǵajap kúıge bólendi.
Sanaly ǵumyrynyń 40 jylyn mádenıet salasyna arnaǵan aǵa býyn ókili Dásten Baımuqanov Muqaǵalı Maqataevtyń sózine jazylǵan Tynyshbaı Rahımovtyń «Neni ańsaımyn» ánin naqyshyna keltire oryndap berdi. Tuńǵysh Prezıdenttiń aldynda áýelete án shyrqap, alǵysyna bólengen Kámılá Álibaeva «Myń bir marjan», Bıbigúl Ábisheva«Tilek» termelerin, Janat Aıtbaev «Aǵashaıaqty», «Qaıyrly Ǵafýrov «Syrǵaqtyny», Baltabaı Ramazanov«Eki jırendi» kelistire aıtyp berdi.
Án festıvalin uıymdastyrýshy, jez tańdaı ánshi, jas ta bolsa bas bola bilgen Birjan Esjanov jurtshylyqqa «Áset pen Kempirbaıdyń qoshtasýyn» usyndy.
Kúlli ulttyq bolmysymyzdy, ónerge degen yntyqtyǵymyzdy, bekzada ánge degen ińkárligimizdi erekshe sazben, ózindik yrǵaqpen ádemi de áserli etip jetkize bilgen úsh býyn ókilderine fılarmonııanyń alǵys hattary men eskertkish syılyqtary tabys etildi.
Soltústik Qazaqstan oblysy