Búgin Almatydaǵy The Ritz-Carlton qonaq úıinde XVI Eýrazııa medıa forýmy bastaldy. On altynshy ret ótkizilip jatqan forýmnyń bıylǵy taqyryby: «Búgingi álem: shynaıylyq transformasııasy?». Forým qonaqtary arasynda CGTN jáne TASS ókilderi, OBB burynǵy basshysy jáne tanymal kınorejısser Sergeı Bodrov bar. Álemniń 60 elinen 500-den asa delegat kelgen.
Forýmnyń basty maqsaty – saıasatkerler, jýrnalıster men sarapshylardyń Qazaqstan, Eýrazııa jáne dúnıejúzilik qaýymdastyqtyń geosaıası, ekonomıkalyq, áleýmettik-mádenı damýymen baılanysty ótkir máselelerdi talqylaýǵa jaǵdaı jasaý.
Búgingi plenarlyq otyrysta jeti taqyryp qarastyrylady. Olardyń qatarynda «Jahan(syz)daný: álem damýdyń jańa úlgisin izdeýde», «Tutyný daǵdarysy», «Mass-medıanyń sıfrlyq shynaıylyǵy: synaqty qabyldaı alamyz ba?» jáne taǵy basqalary bar.
Jıyn barysynda «Ortalyq Azııadaǵy aımaqtyq ıntegrasııa» taqyrybynda dóńgelek ústel ótkiziledi. Onda sarapshylar Ortalyq Azııa elderiniń jańa birlestikteriniń bolashaǵyna óz kózqarastaryn bildiredi.