Vıse-mınıstr 2019 jyldan bastap Elbasynyń tapsyrmasy boıynsha «qarapaıym zattar ekonomıkasyn» damytý boıynsha qoljetimdi nesıelendirý mindetterin sheshý úshin 600 mlrd teńge bólinetinin aıtty.
Ekonomıkalyq qyzmettiń 65 túrinen 365 taýarlyq pozısııa aıqyndaldy. Bul nesıeler «BJK-2020» baǵdarlamasy arqyly sýbsıdııalanady.
A.j. 1 mamyryndaǵy jaǵdaı boıynsha bankter 14,9 mlrd teńge somasyna 28 ótinimdi maquldaǵan. EDB qaraýynda 139,2 mlrd teńgege 104 joba jatyr. 613,4 mlrd teńge somasyna 729 jobanyń qujattary ázirlený satysynda. «Damý» qory 8 mlrd teńge somasyna 24 joba boıynsha sýbsıdııalaýdy maquldady.
Sonymen qatar, bıznesti qarjylandyrýdyń qoljetimdiligin arttyrý maqsatynda «qarapaıym zattar ekonomıkasy» boıynsha aınalymdaǵy qarajatty nesıelendirý úlesin 30%-dan 50%-ǵa deıin arttyrý sharalary qabyldandy. «BJK-2020» arqyly «qarapaıym zattar ekonomıkasyn» kepildendirý tetigi engizildi. Sondaı-aq «BJK-2020» baǵdarlamasy boıynsha qarjylandyrýdy arttyrý usynylady.
«Bıznestiń jol kartasy-2020» baǵdarlamasy boıynsha sýbsıdııalaý men kepildendirýge ótinimder sany jyldan-jylǵa artyp keledi. Elbasynyń tapsyrmasy boıynsha bul baǵdarlamaǵa qosymsha 30 mlrd teńge qarjy bólinetin bolady.
E. Alpysov ákimdikterdiń óńirlik ekonomıkalardy damytýǵa múddeli bolýy kerektigin atap aıtty. Sondyqtan jergilikti atqarýshy organdar memlekettik qoldaý sharalaryn birge qarjylandyrýy tıis.
Mysaly, Almaty ákimdigi qosymsha rezervterden sýbsıdııalaýǵa 1,9 mlrd teńge bóldi. Shymkent ákimdigi de qosymsha rezervterden kepildendirýge 250 mln teńge bóldi. Atyraý oblysynyń ákimdigi sýbsıdııalaýǵa 600 mln teńge bóldi. Qalǵandary osy ákimdikterden úlgi alýy tıis.
«Kásipkerlik - memlekettiń turaqty ekonomıkalyq ósiminiń jáne halyqtyń ál-aýqatynyń mańyzdy túıini. Jalpy, bıznestiń damýynyń oń dınamıkasy baıqalyp otyr. Bıznesti memlekettik qoldaý sharalarynyń kólemi artyp keledi», dedi Ulttyq ekonomıka vıse-mınıstri.
E. Alpysov shaǵyn jáne orta bıznesti odan ári yntalandyrý úshin bıznes-ortany damytý boıynsha zańnamalyq túzetýlerdiń jetinshi paketi qabyldaǵanyn jetkizdi, bul túzetýler kásipkerlik qyzmetti damytý úshin qolaıly jaǵdaılar jasaýǵa baǵyttalǵan.
«DKB-2020» baǵdarlamasyn 2025 jylǵa deıin uzartý aıasynda baǵdarlama tujyrymdamasy ázirlendi, Jumys toby quryldy jáne barlyq deńgeılerde talqylaýlar bastaldy.
Qarjylaı qoldaý tetikterin jetildirýge baǵyttalǵan túzetýler ázirlendi, atap aıtqanda:
kepildendirý úshin nesıe kólemin arttyrý arqyly kepildik boıynsha júktemeni tómendetý;
shaǵyn qarjylyq uıymdardy tartý;
aınalym qarajatynyń úlesin arttyrý;
kásipkerlerdiń tıimdi jobalaryna talaptardy kóterý;
Memlekettik baǵdarlama quraldaryn arttyrý (franshıza, ShOB-ty qarjylaı emes qoldaýdy kúsheıtý, basymdyqty salalardy keńeıtý t.b.) jáne t.b.
Ulttyq ekonomıka vıse-mınıstri bıznes-qaýymdastyqtardy bul iske belsene qatysýǵa shaqyrdy.
«Biz barlyq usynystardy qarastyrýǵa ázirmiz. Men bul sharalardyń bıznesti qoldaý jáne qarjylandyrý sharalarynyń qoljetimdiligin arttyratynyna, sondaı-aq bıznestiń el ekonomıkasyna úlesin kóbeıtý múmkindigin týdyratynyna senimdimin. Kásipkerlikke qoldaý kórsetý mańyzdy. Mınıstrlik árdaıym mundaı jumystardy jalǵastyra beretin bolady», dedi E. Alpysov.