«Aýyl sharýashylyǵyn qarjylaı qoldaý qory» AQ basqarma tóraǵasy Jandar Omarovtyń aıtýynsha, 2017-2021 jyldarǵa arnalǵan «Eńbek» nátıjeli jumyspen qamtý jáne jappaı kásipkerlikti damytý baǵdarlamasy «Jumyspen qamtýdyń jol kartasy-2020» baǵdarlamasynyń jalǵasy. Baǵdarlamanyń operatorlary «QazAgronyń» enshiles kompanııalary – «Agrarlyq nesıe korporasııasy» AQ, «Aýyl sharýashylyǵyn qarjylaı qoldaý qory» AQ jáne «QazAgroKepil» AQ. Baǵdarlamanyń maqsaty – eldiń jumyssyz azamattary, ózin ózi jumyspen qamtyǵan turǵyndar, kásipkerler, aýyl sharýashylyǵy kooperatıvteri men olardyń músheleri, zeınetkerlik jasqa tolmaǵan adamdar, zákirlik kooperasııaǵa qatysýshylardy qosa alǵanda, sharýa jáne fermer qojalyqtaryna qoldaý kórsetý.
Nátıjeli jumyspen qamtý jáne jappaı kásipkerlikti damytý baǵdarlamasy boıynsha nesıeler ártúrli maqsatqa jylyna 6 paıyzdyq syıaqy mólsherlemesimen beriledi. Bul rette tıimdi jyldyq mólsherleme 6,7 paıyzdan aspaıdy. Nesıe ónimine baılanysty kezeńi, somasy, jeńildik kezeńiniń uzaqtyǵy ózgeredi.
Aǵymdaǵy jyly Aýyl sharýashylyǵyn qarjylaı qoldaý qory 62,1 mlrd teńge somasynda qaryz berýdi josparlap otyr. Onyń ishinde Nátıjeli jumyspen qamtý baǵdarlamasy boıynsha – 27,5 mlrd teńge. Etti jáne sútti mal sharýashylyǵyn damytý jónindegi jobalardy qarjylandyrýǵa basymdyq beriletinin aıta ketý kerek.
Al «Agrarlyq nesıe korporasııasy» AQ basqarýshy dırektory Gúlmıra Erǵalıeva korporasııanyń baǵdarlamaǵa qatysýshylardy qarjylandyrýdy mıkroqarjylyq uıymdar arqyly júrgizetinin aıtty. Bul satý arnalarynyń sanyn arttyrady jáne aýdan ortalyqtary men shalǵaı aýyldarda nesıe alýǵa múmkindik beredi. Korporasııa qaryz alýshylarǵa 84 aı merzimge 8000 AEK-ke deıin 6 paıyzben nesıe beredi. Bul qarjy mal sharýashylyǵyna, ósimdik sharýashylyǵyna, sondaı-aq aýyldyq jerlerdegi aýyl sharýashylyǵy emes bıznes túrlerine arnalǵan. 2019 jyly 17,482 mlrd teńge kóleminde qarjy bólý josparlanyp otyr.
Nesıe alýshylar kepil múlki jetispegen jaǵdaıda baǵdarlamaǵa qatysatyn taǵy bir uıym «QazAgroKepil» AQ arqyly bıýdjet qarajaty esebinen kepildikke ıe bola alady. Bul uıym isin jańa bastaǵan kásipkerlerdiń startap jobalaryn bastaýǵa, sondaı-aq jumys istep turǵan bıznesti keńeıtýge baǵyttalǵan qoldaýdy júzege asyrady.
– Kepildik berý quralyn 726 fermer paıdalandy, basym bóligi bıznesin nólden bastaǵan kásipkerler. Qazir bizdiń uıym arqyly berilgen kepildikterdiń jalpy somasy 2 596 mln teńgege jetti. Kepildikpen berilgen qaryzdyń ortasha somasy – 6,6 mln teńge, ortasha soma 3,2 mln teńge, – dedi «QazAgroKepil» AQ basqarma tóraǵasy Qazbek Imanqulov.
Qazirgi ýaqytta «QazAgro» ulttyq holdınginiń enshiles kompanııalarynyń barlyq fılıaldarynda nesıe berýge jáne kepildendirýge ótinimder qabyldaý bastaldy.