Jıynǵa RF-nyń Ekaterınbýrg, Orynbor qalalarynan Maksım Cherepanov, Vıtalıı Popov, Elena Mıshenko syndy t.b. quqyq salasynyń professorlary men zań ǵylymdarynyń doktory, oqytýshylar arnaıy kelgen.
Sonymen qatar, aýqymdy basqosýǵa Nur-Sultan qalasynan QR Parlamenti Senatynyń depýtattary, Konstıtýsııalyq quqyq, sot júıesi jáne quqyq qorǵaý organdary komıtetiniń múshesi Marat Taǵımov, Agrarlyq máseleler, qorshaǵan ortany qorǵaý jáne aýyldyq aýmaqtardy damytý komıtetiniń múshesi Muhtar Jumaǵazıev, QR Parlamenti Májilisiniń Zańnama jáne sot-quqyqtyq reforma jónindegi komıtetiniń tóraǵasy Nurlan Ábdirov, QR IIM Ákimshilik polısııa komıtetiniń tóraǵasy Maqsat Baıbolov syndy jáne jergilikti Aqtóbe oblystyq Polısııa deparatmentiniń bastyǵy Atyǵaı Arystanov, oblys prokýrory Marat Qaıbjanov jáne jalpy 250-ge jýyq mamandar qatysty. Jáne oblysqa qarasty 12 aýdannyń ákimderi konferensııaǵa onlaın rejımde qatysty.
Basqosý barysynda quqyq buzýshylyqtyń aldyn-alý, onymen qalaı kúresý jaıyndaǵy máseleler kóterilip, ashyq pikirler aıtyldy. Máselen, azamattardyń tergeý jumystarynyń júrgizilýine at salysý belsendiligi tómen, normatıvti-quqyqtyq retteýlerdi azamattardyń qatysýymen jetildirý, sonymen birge áleýmettik jelilerde zańdyq talaptardyń oryndalý deńgeıi sekildi birneshe saýaldar talqylandy.
Mamandardyń málimetinshe, elimizde qylmys sany jyldan jylǵa azaıyp otyr. Onyń ishinde Aqtóbe oblysynda ótken jyldyń osy kezeńimen salystyrǵanda quqyq buzýshylyq sany 12,3% tómendegen. Máselen, jyl basynan beri 4339 quqyq buzýshylyq tirkelse, ótken jyly bul kórsetkish 4978-di kórsetken.
Oblys ákimi Ońdasyn Orazalın eń bastysy, halyqtyń qaýipsizdigin qamtamasyz etý, azamattardyń óz quqyqtaryn iske asyrý maqsattarynda jumystar jasalý qajettigin aıtty.
«Aldymyzda áleýmettik máselelerdiń toǵysynda turǵan problemalardy qaraý mindeti tur, bul quqyq buzýshylyqtyń aldyn alý úshin qoǵam bolyp kúresý kózqarasyn qalyptastyrý kerek. Osy basqosý quqyqtyq memlekettiń qalyptasýyna qosymsha qadamdar jasaýǵa kómektesedi dep senemin»,-dedi oblys ákimi.
Konferensııaǵa kelgen qonaqtar aımaq basshysyna jıynnyń joǵary dárejede uıymdastyrylǵanyna alǵys bildirip, basqosýdy turaqty túrde ótkiziletinine senim bildirdi.