- Bıyl qabyldanǵan «Kınematografııa týraly» Zańǵa sáıkes prokattaǵy fılmderge tıtr berý nemese dýblıaj arqyly memlekettik tilge aýdarýdy kınoprokat quqyǵyn ıelenýshi dıstrıbıýtor qamtamasyz etedi. Memlekettik tilge kásibı dýblıaj jasalǵan fılmderdiń sırek kezdesýiniń sebebin túsindirýde dıstrıbıýtorlar onyń qymbatshylyǵyna silteıdi. Dýblıajǵa jumsalǵan qarjy fılmniń Qazaqstandaǵy kórsetiliminen túsken paıdadan asyp túsýi múmkin, sondyqtan kóbinese tıtr arqyly aýdarmaǵa júginedi,- dep jazdy A.Muhamedıuly.
Mınıstrdiń jazýynsha, ókinishke qaraı, fılmderdi qazaq tiline aýdarǵanda keıbir kınokórsetýshiler tarapynan qatelerge jol beriledi.
- «Mýmbaı oteli: Taıtalas» fılminde osy jaǵdaı kezdesti. Kórermenderden túsken shaǵymdar negizinde atalǵan fılmniń prokatqa berilgen kýáligin alyp qoıý týraly sheshim qabyldadyq. Kınoprokat quqyǵyn ıelenýshilerge fılmderdi memlekettik tilge grammatıkalyq qatesiz, maǵynasyn túsinikti etip, kórermenderdiń renishin týdyrmaıtyndaı qylyp aýdarýdy ótinemin. Qatań shara qoldanǵymyz kelmegenmen, «Kınematografııa týraly» Zańnyń iske asýy biz úshin óte mańyzdy. Sizder túsinistikpen qabyldaıdy dep senemin, - dep jazdy ol.