Aıtýly dodaǵa áıelder arasyndaǵy elimizdiń eń úzdik juby – Tatıana Mashkova men Irına Sımbalova qatysqan joq. Sol sebepti de altyn tuǵyr úshin tartys «Almaty» men «Kaspıı» (Aqtaý) voleıbol klýby ókilderi arasynda ótti. Aıtýly komandalardyń qos juby jartylaı fınalǵa deıin súrinbeı jetti. Osy mejede Tańsulý Qaıyrbekova men Aıǵanym Smaǵul Alena Chýgaınova men Dana Shyńǵysovany utsa, Madına О́teýlına men Elızaveta Eropkına Anastasııa Ýkolova men Dana Rýbılkodan basym tústi.
Úshinshi oryn úshin básekede Aqtaýdyń qos komandasy kúsh synasty. Bul tartys Anastasııa Ýkolova men Dana Rýbılkonyń paıdasyna sheshildi. Fınalda almatylyqtar kezdesti. Bul oıynda Tańsulý Qaıyrbekova men Aıǵanym Smaǵuldyń baǵy jandy.
Erler arasynda «Býrevestnıktiń» oıynshylary – Kırıll Gýrın men Nurdos Aldash qola medaldi enshilese, fınalda respýblıkamyzdyń eń úzdikteri – Aleksandr Dıachenko men Sergeı Sıdorenko aqtaýlyq Aleksandr Babıchev pen Alekseı Kýleshovty qapy qaldyrdy.
Sóıtip, alty júldeli orynnyń tórteýin Almaty qalasynyń jaǵajaı voleıbolshylary ıelendi. Endi el birinishiliginiń kelesi týry maýsym aıynyń sońynda Aqtaýda ótedi.