Balalardy qorǵaý kúni merekesiniń shalqyǵan shattyǵy tarqamaı, ile osyndaı áleýmettik qamqorlyqty áıgileıtin oqıǵanyń oryn alýy elimizde otbasylyq qundylyqtardy saqtaý jáne qanatty qamqorlyq kórsetýdiń jarqyn mysaly ispetti. Saltanatty rásimge jınalǵan jamaǵattyń qýanyshynda shek joq. Bir-birinen súıinshi surap, qutty bolsyn aıtyp, aqjarylqap tilekterin jetkizip jatty.
Aldymen sóz alǵan oblys ákimi Ermek Marjyqpaev kópshilikti merekelerimen quttyqtaı kelip, Elbasy Nursultan Nazarbaevtyń táýelsizdiktiń alǵashqy jyldarynan bastap árbir qazaqstandyqtyń jaǵdaıyn jaqsartýǵa aıryqsha kóńil bólip kelgendigin ekpin túsire aıtyp ótti. Qaýmalaǵan qaýymǵa oblys ákimi dál osyndaı qamqorlyqtyń altyn tini úzilmeıtindigin, aldaǵy ýaqytta da jalǵasa beretindigin jetkizdi. Qazir bul máselege el Prezıdenti Qasym-Jomart Toqaev erekshe mán berip otyr. Osy oraıda, memlekettik sharapaty mol baǵdarlamalar túzilip, ıgilikti ister júzege asyrylýda. Aqmola oblysynda da sońǵy jyldary qurylys jumystary qarqyndy júrgizilýde. Jer-jerde turǵyn úıler burynǵymen salystyrǵanda kóp salynǵan soń búgingideı jan jadyratar jaqsy isti sátimen sabaqtaýǵa mol múmkindik týyp otyr. Sońǵy eki jylda «Nurly jer» baǵdarlamasyn júzege asyrý aıasynda jalǵa jáne nesıege beriletin 11 kópqabatty úı turǵyzylyp, 8350 otbasy turǵyn úı jaǵdaıyn jaqsartty. Oblys ortalyǵynda da oralymdy sharýalar júzege asyrylýda. Sońǵy bes jyldyń ishinde jańadan boı kótergen Saryarqa shaǵyn aýdanynda 37 kópqabatty úı turǵyzylyp, eki júzge jýyq páterge muqtaj otbasylar qonys toıyn toılady.
– Memlekettiń osy bir qamqorlyǵyna ana retinde et júregiń eljireıtindigi sózsiz, – deıdi on balanyń anasy Svetlana Sádýaqasova, –qýanyshtan aýzyma sóz túspeı tur. Aıtar alǵysym sheksiz. 14 jyl boıy kezekte turyp edim.
Páterge qol jetkizip, kól-kósir qýanyshqa kenelgen qala turǵynynyń biri Roman Chep. Ol 2013 jyly balalar úıinen úlken ómirge joldama alǵan eken. Búginde ózi eki balanyń ákesi. Jańa páterge ıe bolǵan Romannyń da áleýmettik kómek turǵysyndaǵy memleket saıasatyna degen rızashylyǵyn tilmen aıtyp jetkizý múmkin emes. Alty bala baǵyp otyrǵan Erkin Baltabaevtyń otbasy da kópten kútken armandary oryndalyp, qýanyshqa kenelip qaldy. Dál osy kúni 70 otbasy jańadan boı kótergen, syńǵyrap turǵan jańa úıde qonys toıyn toılap, tóbeleri kókke bir-aq eli jetpeı qaldy.
Saltanatty rásimnen keıin oblys ákimi bastaǵan resmı top paıdalanýǵa berilgen páterlerdi aralap kórdi. Jańa páter ıeleri ózderi de bizderde mynadaı bar, mynadaı bar dep, kelgenderge quraq ushyp qarsy alyp, kórsetip jatyr. Turǵyn úıdiń aldyndaǵy alań abattandyrylǵan, balalar oınaıtyn alań jasalypty.
Kópten beri úı kezeginde turǵan adamdar birtindep dál osylaı turǵyn máselesin sheshetin bolady.