FIE halyqaralyq kúntizbesinde jylyna osyndaı sanattaǵy bes týrnır ǵana bar. Ony Shveısarııa, Germanııa, BAÁ, Kanada elderi ótkizip júr. Ortalyq Azııadaǵy bes eldiń ishinen alǵash bolyp qazaq dalasynda jalaýyn jelbiretti. El senimin arqalap shyqqan 30 sportshynyń arasynan jekeleı synda Rýslan Qurbanov qana senimdi aqtap, kúmis júlde enshiledi. Fınalǵa deıingi qarsylastaryn aıqyn jeńgen semserlesýshi shırek fınalda Olımpıadanyń eki dúrkin jeńimpazy, álem chempıony japon Kokı Kanony súrindirdi. Altyn medalǵa talasta ýkraınalyq Roman Svıchkarge ese jiberdi. Erler men áıelder arasyndaǵy komandalyq saıysta bizdiń jigitter qola júldege talasyp, Japonııa quramasyna ese jiberdi. Al áıelder quramasy irikteý kezeńinde Izraıl semserlesýshilerinen asa almady.
Fransııa astanasy — Parıjde ártistik júzýden álem kýboginiń ekinshi kezeńi ótip jatyr. Tehnıkalyq baǵdarlama synynda Vıktor Drýzın 226.6050 upaı enshilep, qola medal enshiledi. Altyn medal qytaılyq Go Mýege buıyrsa, brıtandyq Randjýo Tomblın kúmis medal oljalady. Taǵy bir otandasymyz Edýard Kım 4-orynǵa turaqtady. Tehnıkalyq baǵdarlamadan aralas dýet saıysynda Aldııar Ramazanov pen Iаsmın Islamova 211.1267 upaımen kúmis júldege qol jetkizdi.
Mońǵolııa astanasy — Ulanbatyrda bokstan Azııa chempıonaty jalaýyn jelbiretti. Jerebe tartý rásiminde boksshylarymyzdyń alǵashqy qarsylastary anyqtaldy. 50 kg salmaqta Sanjar Táshkenbaı qyrǵyz Baǵlan Ergeshov pen úndistandyq Vıshvanat Sýresh jekpe-jeginiń jeńimpazymen aıqasqa túsedi. 55 kg salmaqta Mahmud Sabyrhan da dodany ekinshi kezeńnen bastap, ıordanııalyq Mahdı Almasaleh pen ózbekstandyq Shahzod Mýzafarov arasyndaǵy jekpe-jektiń jeńimpazymen judyryqtasady. Orazbek Asylqulov (60 kg) fılıppındik Pol Baskonnyń qarymyn baıqap kóredi. Ertýǵan Zeınýllınov (65 kg) taıbeılik Iý.Lınge qarsy rıngke shyqsa, Tórehan Sabyrhan (70 kg) Ońtústik Koreıa boksshysy Kım Iýn Sý men tájikstandyq Shamsher Saıdov tartysynyń jeńimpazymen judyryqtasady. Sabyrjan Aqhalyqov (75 kg) japon Iаgı Talganyń qarymyn baıqasa, Erasyl Jaqpekov (80 kg) qyrǵyzstandyq Saǵyn Satybaldy men ózbekstandyq Fazlıddın Erkınbov jekpe-jeginde jeńiske jetken boksshymen aıqasady. Nurbek Oralbaı (85 kg) mońǵolııalyq Barlaahan Dorý men ıordanııalyq Mohammad Sýleıman jekpe-jeginiń jeńimpazynyń áleýetin baıqaıdy. 90 kg salmaqta Saǵyndyq Toǵambaı qytaılyq Han Sıýechjenge qarsy aıqassa, asa aýyr salmaqta Aıbek Oralbaıdyń alǵashqy qarsylasy mońǵolııalyq Beknur Halı men ózbekstandyq Arman Mahanov jekpe-jeginde anyqtalady.
Horvatııanyń Dýbrovnık qalasynda dzıýdodan Eýropa kýbogi ótti. Balýandarymyz halyqaralyq dodadan úsh medal enshiledi. Danııar Shamshaev barlyq qarsylasyn jyǵyp, chempıon atansa, Damır Bolatbekov (60 kg) kúmis medaldy mise tutty. Qyzdar arasynda Tolqyn Tursynaqynovaǵa (+78 kg) qola medal buıyrdy. Jarysqa 32 elden kelgen 300-den asa balýan qatysty.