Qostanaıda oblystyq «Jas tulpar» oqýshylar aıtysy ótti. Astyqty óńirdiń 90 jyldyǵyna oraı uıymdastyrylǵan dástúrli jyr dodasynda 19 bala aqyn baq synasty.
Jyr saıysynyń shymyldyǵyn ashyp bergen oblystyq kórkemónerpazdar shyǵarmashylyǵy ortalyǵynyń basshysy Dámir Qalqaev bıyl 34-márte ótip jatqan «Jas tulpardyń» tarıhyna sholý jasap, jas urpaqqa ultyq tárbıe berýde atalǵan jobanyń orny bólek ekenin tilge tıek etti.
«Jas tulpardan» túlegen jastardyń kóbi – búginde osy óńirge óreli ónerimen, adal eńbegimen tanylyp júrgen azamattar. Sonaý 1992 jyldan beri úzilmegen dástúrli joba – naǵyz óner mektebi. Búgin osy aıtystyń basy-qasynda júrip, talaı jasqa qamqorlyq etken belgili aqyn-satırık Ǵumar Ahmetshın aǵamyzdyń atyna arnaıy syılyq taǵaıyndalyp otyr. Ol kisi «Jas tulpardyń» qazylar alqasynyń turaqty tóraǵasy, batagóı aqsaqaly bolyp edi. Búgingi aıtysqa birazdan beri respýblıka kóleminde óner kórsetip júrgen, kádimgideı tóselgen tájirıbeli aqyndarmen qatar, sahnaǵa birinshi ret shyǵaıyn dep turǵan balǵyn ónerpazdar da qatysyp otyr», dedi Dámir Qalqaev.
Aıtystyń irikteý kezeńinde sóz saıystyrǵan 10 jup óńir tarıhyn, Ybyraı, Ahmet, Mirjaqyp, Shoqan syndy birtýar tulǵalardy jyrǵa qosty. Birinshi kezeńde qara úzip shyqqan 2 jup sheshýshi kezeńde baq synasty.
«Jas tulpardyń» bas júldesin Arqalyq qalasynyń jas aqyny Nurıslam Raǵat jeńip aldy. Nurıslam soǵys órtinde qalǵan elderdi mysal ete kelip, birlik-yntymaq, berekeli eńbek, beıbit ómirge jetetin eshteńe joq ekenin jetkize jyrlady. Kórermen zalynyń art jaǵyndaǵy birneshe qatarda Ulttyq ulan sarbazdary otyrǵan. Jas aqynnyń ulandarǵa qarata sóz arnap: «Qaldy ǵoı beıbit ómir jaı tús bolyp, qyrylyp áskerleri tal túste ólip, al bizdiń beıbit eldiń sarbazdary, jaıbaraqat zalda otyr aıtys kórip», degeni kópshilik kókeıindegi oıdy dóp basqandaı boldy.
Birinshi oryndy torǵaılyq Tańjaryq Nııazbek jeńip aldy. О́zinen 3–4 jas úlkendigi bar aqyndarmen teń óner kórsete bilgen eń jas aqyn Nurbolat Aıboluly (Arqalyq) ekinshi orynnan kórindi. Úshinshi oryn Sarykólden kelgen Nurıslam Oralbaıdyń enshisine buıyrdy. Al Qostanaıdyń jas aqyny Inabat Naǵashybaı Ǵ.Ahmetshın atyndaǵy arnaıy syılyqty aldy.
Qostanaı oblysy