О́zbekstannyń Buqara qalasynda kókpardan halyqaralyq týrnır ótti. Elimizdiń quramasy irikteý kezeńinde qarsylastaryn iri eseppen eńserdi. Fınaldyq tartysta qyrǵyz kókparshylaryn súrindirip, dúbirli dodada jeńiske jetti.
Dúbirli alamannyń alǵashqy básekelerinde kókparshylarymyz Qytaı komandasyn 11:0 esebimen jeńse, О́zbekstannyń birinshi quramasyn 11:2 nátıjesimen eńserdi. Fınalda Qyrǵyzstan quramasyn 3:0 esebimen utty. Jerlesimiz Erǵalym Jaqsylyq halyqaralyq týrnırdiń úzdik oıynshysy ári surmergeni atandy. Jas oǵlan dúbirli dodada óziniń ábjildigimen daralandy.
«Jastarymyz júktelgen senimge selkeý túsirmeı, syn sátinde jasyndaı jarqyrady. Biz osy týrnırde chempıon atanýdy maqsat etip, tyńǵylyqty daıyndaldyq. Arǵymaqtarymyz da dodaǵa jarap, qaırat tanytty. Jigitter qatelikke boı aldyrmaı, qarsylastardyń taktıkalyq josparyn buzyp, ózderiniń oıyn órnegin áıgiledi. Alda eń úlken alaman – Dúnıejúzilik kóshpeliler oıyndary. Qyrǵyzstanda qońyr kúzde ótetin osy saıysta barymyzdy salamyz», dedi ulttyq quramanyń bas bapkeri Nurdáýlet Momynov.