Mańyzdy mádenı sharanyń saltanatty ashylýynda Jezqazǵan qalasy ákiminiń orynbasary Zına Aqylbekova, Qaraǵandy oblysynyń mádenıet, muraǵattar jáne qujattama basqarmasynyń basshysy Erkebulan Aǵymbaev jáne «Muraǵat-2025» ǵylymı-ádistemelik ortalyǵynyń jetekshisi Berik Ábdiǵalıuly, Qaraǵandy oblystyq máslıhatynyń depýtaty, mesenat Bekzat Altynbekov quttyqtaý sóz sóıledi.
Festıvaldiń alǵashqy kúni «О́z esimińdi tarıhta qaldyr» aksııasy ótkennen keıin, Jezqazǵan tarıhı-arheologııalyq murajaıy, Túrik Respýblıkasynyń Ankara ýnıversıteti men Astrahan mýzeı-qoryǵy arasynda yntymaqtastyq týraly úshjaqty memorandýmǵa qol qoıyldy.
Budan keıin baǵdarlamaǵa saı, qoldanbaly óner boıynsha sheberlik dáristeri uıymdastyrylyp, oǵan murajaılardyń sýretshi-restavratorlary, qysh isiniń sheberleri belsene at salysty.
Festıvalde uıymdastyrylǵan «Uly Dala murasy» ekspozısııasynda elimizdiń 60-tan astam biregeı jádigeri qatysýshylar men qonaqtar nazaryna usynyldy. Sonyń ishinde jurtty ózine qaratqan eksponattyń biri «Altyn adam» jádigeriniń kóshirmesi boldy. Sonymen qatar, kórmede basqa elderdiń murajaılarynan jetkizilgen sırek kezdesetin jádigerler de tanystyryldy.
Halyqaralyq festıvalge qatysýshy qonaqtar qur qol kelmegen eken. Mysaly, Qytaı delegasııasy Qaraǵandy oblysynyń mádenıet, muraǵattar jáne qujattama basqarmasynyń ıeligine XVIII ǵasyrdaǵy Qytaı men Qazaqstan arasyndaǵy jibek saýdasy týraly qujattyń kóshirmesin syıǵa tartty. Mońǵol delegasııasy bolsa, qazaq dıasporasynyń Mońǵolııa aýmaǵyna qalaı qonys aýdarǵany týraly qujattyń kóshirmesin ákelipti. Al ózbek delegasııasy XIX-XX ǵasyrlardaǵy qazaq halqynyń tarıhyna qatysty qujattar men fotosýretterdiń kóshirmesin tartý etti.
Festıvaldiń ekinshi kúni qatysýshylar úshin murajaı qyzmetkerlerine arnalǵan «Murajaı qyzmetin jahandyq jańǵyrtý – ýaqyt qajettiligi» taqyrybynda semınar-trenıng uıymdastyrylady. Shara barysynda Ankara ýnıversıtetiniń professory Aısha Chakır Ilhan, joǵary sanatty ekskýrsovod-ádisker, Qazaq sport jáne týrızm akademııasynyń týrızm sarapshysy, IýNESKO ulttyq komıssııasynyń múshesi Baqyt Orazymbetova, tarıh ǵylymdarynyń kandıdaty, Ál-Farabı atyndaǵy QazUÝ arheologııa, etnologııa jáne mýzeologııa kafedrasynyń dosenti, professor Táttigúl Qartaeva jáne basqa da tanymal tulǵalar dáris oqyp, tájirıbelerimen bólisedi.
Halyqaralyq festıvaldiń qorytyndy kúni, ıaǵnı 13 maýsymda qonaqtarǵa arnalyp Ult uıasy – Ulytaýdyń tarıh tunǵan qasıetti jerlerine saıahat uıymdastyrylady.
Eske salsaq, «Rýhanı jańǵyrý» baǵdarlamasy aıasynda uıymdastyrylǵan bul mádenı shara Qazaqstan Respýblıkasynyń Tuńǵysh Prezıdenti N.Á. Nazarbaevtyń «Qoǵamdyq sanany jańǵyrtý» jáne «Uly dalanyń jeti qyry» atty baǵdarlamalyq maqalalarynda aıtylǵan mindetterdi júzege asyrýǵa septigin tıgizýdi maqsat etedi.