El qamyn oılaǵan, joq-jitikke qamqor bolyp, aǵaıyndy bir-birimen jaqyndatyp, birligin nyǵaıtqan, keleshegin oılaǵan qoǵam qaıratkeri. Tekti tulǵanyń boıyndaǵy keıbir minezine qarap, halyq Pań Nurmaǵambet atap ketken. Biraq sol kirpııaz minez, talǵampaz túısik bıikke de kótergen. Sham shaharynda qajylyq saparǵa barǵan Alash balasyna arnap, óz qarajatyna arnaıy úı salǵyzǵan, tórt ret qajylyqqa barǵan adam.
Aıryqsha ásemdikti, sán men saltanatty jaqsy kórgen. XIX ǵasyrdyń sońynda II Nıkolaı ımperatordy qarsy alyp, qazaq halqynyń turmys-tirshiligin kórsetken. Jaqsy jaǵynan, árıne. San ǵasyr boıy jalǵasyp kele jatqan salt-dástúrdi de qolmen qoıǵandaı etip sanalaryna quıyp bergen. Qazaqtyń boıyndaǵy tamasha talantty áıgileıtin qolóner sheberleriniń kórmesin de uıymdastyrǵan. Sol kórmede Pań Nurmaǵambettiń tikken kıiz úıi bas báıgeni alsa kerek. Úıdiń súıegi ǵana emes, aqshańqan kıizi de, ishindegi nebir asyl buıymdary da támam jurtty tańǵaldyrǵan desedi.
Keıin on eki qanat aq orda Nıjnıı Novgorodta ótken búkilreseılik kórmege, Parıj qalasynda ótken baıqaýǵa qoıylǵan. Qazirgi kúni Sankt-Peterbýrgtegi Ermıtajda saqtaýly. 1898 jyly jylqy sharýashylyǵyn asyldandyrýǵa qosqan úlesi úshin altyn medal men saǵat alǵan.
Nurmaǵambet Saǵynaıulynyń qazaq qoǵamyn órkenıetke jeteleýdegi eńbegi óz aldyna bir tóbe. О́neri óris jaıǵan ózge elderdegi jaqsy isti Ereımenniń etegine ákelip, elge kórsetip, jalpaq jurtty osyndaı jaqsylyqqa jetelegen. Moıny ozyq tájirıbelerdi týǵan halqynyń boıyna sińirýge tyrysqan. Demek, burynǵy qazaq baılarynyń boıyndaǵy jalǵyz baılyqty ǵana mise tutpaı, eliniń erteńine eleńdegen ultjandylyq qasıetti Pań Nurmaǵambettiń beınesinen aıqyn kórýge bolady.
Alash kósemderi Á.Bókeıhannyń, M.Dýlatulynyń ulaǵaty mol ulttyq mańyzdy isterine qarjylaı kómek kórsetken. Mazary Aqsý kenishiniń mańynda tur.