– Qurmetti Alfııa Qabylqyzy, eski jaranyń aýzyn tyrnady dep ókpelemeńizshi. Bizdiń nıet jaryq dúnıeden aqqan juldyz ispetti jarq etip óte shyqqan, tal boıyndaǵy batyrlyq, erlik minezimen el esinde qalǵan ulyńyz Shyńǵystyń sońǵy áreketi jaıynda sizden bilý.
– Áli kúnge deıin, shynyn aıtaıyn, kókiregim tuz quıǵandaı ashıdy. Azamat bolyp ósip qalǵan bala. Astanadaǵy №53 orta mektepti bitirgen shaǵy, 17 jasta bolatyn. Astananyń irgesindegi Orazaq aýylyndaǵy týystarymyzǵa qonaq bolyp ketken. Mundaı oqıǵa bolady degen oı qaperimizge de kirip shyqpaǵan. Tóbemizden jaı túskendeı boldy.
– Qaraly oqıǵa qalaı órbigen eken?
– Keıin estidik qoı. Sonda da kóńil senbeıdi. Shyńǵystyń ózi sýdan júzýmen shuǵyldanǵan, maltýdy jaqsy meńgergen bala edi. Tipti júzýmen kásibı túrde aınalysty desem de bolady. Sol myqtylyǵynyń arqasynda eki balany ajaldyń aýzynan julyp aldy. Al, ózi bolsa, jazmysh qoı, qazaǵa ushyrady. Qansha ýaqyt ótse de ulymnyń kókteı solǵanyn eske alý, aıtý men úshin óte aýyr. Bir shybyq tamyrymen julyndy. Dátke qýaty eki báıterek ósip jetiledi. Meniń ne týraly aıtyp otyrǵanymdy túsinip otyrǵan shyǵarsyń. Aınalaıyn qulynym, ekindige deıin uıyqtap, sodan soń et jaqyn aǵaıyn-týystyń balalaryn izdep shyqqan ǵoı. Týysqan balalarmen birge balapandarǵa qora salmaqshy bolypty. Batqan jeri kólkigen kól de, alasurǵan ózen de emes, ánsheıin oıyqqa úımelegen qara sý. Taǵdyrdyń aıdap aparǵany da. Balalardyń sýǵa batyp bara jatqanyn kórgen soń álgi aıdynǵa sekirgen. Birinshi balany ońaı alyp shyqqan kórinedi. Qıyndyq ekinshisinde týsa kerek. Álgi balanyń qorqynyshtan esi shyǵyp ketken ǵoı. Ie bola almady desedi. Biletinder sýǵa ketip bara jatqan adam qolyna ilikkendi bosatpaıdy deıtuǵyn. Burynǵylardyń «sýǵa ketken tal qarmaıdy» deıtini yp-ras. Býlyqqan balanyń qarmaǵan taly Shyńǵys bolǵany da. О́zi de ábden sharshaǵan, onyń ústine sý jutqan, áli qurǵany ǵoı, ajaldyń osy jerden kelgeni.
– Oqýshy kezinde qandaı bala boldy?
– Kógershinim kópshil edi. Qarapaıym, kez-kelgen adamǵa qolynan kelse jaqsylyq jasaýǵa umtylatyn. Osy bir jibekteı esilgen jaqsy minezine oraı qorshaǵan ortasy onyń da synyq minezin qatty unatatyn. Dos-jarandary kóp. Tipti, bir kórgen adamnyń ózimen tonnyń ishki baýyndaı jaqyndasyp ketetin. Árıne, oqýda ozat boldy dep aıta almaımyn. Baýyrmaldyǵymen, azamattyq minezimen ozat edi. Balalardy jaqsy kóretin. О́zimizdiń aǵaıyn-týystyń balalaryn ǵana emes, kórshi-qolańnyń da kishkentaılaryn erkeletip, aıalap júretin. О́mirde ne bolmaıdy? Ekinshi ret turmys qurarda eseıip qalǵan balamen aqyldastym. Qarsy bolǵan joq. Shyńǵys Maratuly meniń tula boıy tuńǵyshym ǵoı. Odan keıin ómirge eki qyz keldi. Jaryq dúnıege kishkentaı qaryndastary kelgende, qýanǵanyn kórseńiz.
– О́kinishtiń orny tolýy qıyn. Ana kókireginde ne bar?
– Qazir men boıymdaǵy bar kúsh-qýatymdy jınap balamnyń talaıly taǵdyry týraly tolǵana aıtqym keledi. Batyr bala tárbıeledim dep emes, basqanyń baqytyn qorǵaıyqshy dep. Qaıǵyly oqıǵa oryn alǵan sý kózi ajaldyń apanyndaı bolyp áli jatyr. Árbir eldi mekende kishkentaılarǵa qaýipti osyndaı jerler jabylsa eken. Al, ata-ana bolsa, baýyr eti balalaryn kózinen tasa qylmasynshy! О́zgeniń ómiri úshin jas janyn qıyp ketý erlik. Biraq, tirlikke ne jetsin?! Ánsheıinde biz jaza baspaǵan soń janymyzdaǵy qaýip-qaterdi ańdaı bermeımiz. Jergilikti bılik ókilderi halyqpen birlese otyryp, bar balanyń amandyǵy úshin keshendi sharýa atqarýy kerek shyǵar. Eliniń er minezdi ulyn joqtaǵan «Egemen Qazaqstan» gazetine rahmet. Áıtpese, meniń balamnyń erlik isin baıandaǵan aýdandyq gazetke shyqqan jalǵyz habardan basqa eshteńe qalǵan joq.
– Áńgimeńizge rahmet. Shyńǵystaı shuraıly uldyń jany jánnatta bolsyn!
Suhbattasqan menshikti tilshimiz Baıqal BAIÁDIL