Sapar barysynda Premer-Mınıstr aldymen «Qazaqstandyq Agro-Innovasııalyq Korporasııasy» jaýapkershiligi shekteýli seriktestiginde boldy. Bul kásiporynda astyqty aımaq úshin asa qajetti ártúrli aýyl sharýashylyǵy tehnıkalary jınalady. Qýatty tehnıkalardyń tirkemeleri jergilikti jerde jasalady. Jobanyń quny 4,7 mıllıard teńge. 2016 jyly paıdalanýǵa berilgen kásiporynnyń ár jyl saıyn 1500 dana tehnıka shyǵarýǵa múmkindigi bar. Qazirgi kúni kásiporyn shyǵarǵan tehnıkalarǵa elimizdiń kóptegen óńirlerinen suranys túsýde.
Premer-Mınıstr kásiporyndaǵy alýan túrli tehnıka úlgilerimen tanysyp, sheteldik aýyl sharýashylyǵynyń osy zamanǵy asa qýatty tehnıkalaryna básekeles bola alatyn qabilet-qarymyn baǵamdady. Munan soń oblys ortalyǵynda salynyp jatqan «Kókshetaý» forým-ortalyǵynyń qurylys alańynda boldy. «Aq jelken» qonaq úı kesheninde bolǵan kezinde oblys ákimi Ermek Marjyqpaev qalanyń bas jobasyna baılanysty Qopa kólin jaǵalaı salynatyn zamanaýı qurylys josparymen egjeı-tegjeıli tanystyrdy. Kól jaǵalaýy abattandyrylyp, kópqabatty úılermen qatar, áleýmettik-turmystyq qyzmet kórsetetin sanalýan nysandar boı kótermek. Kenesary kóshesinen bastaý alatyn keń dańǵyl jaǵalaýdy janaı ótip, Vasılkovka shaǵyn aýdanyna deıin sozylady. Bul joba qala kórkin kirgizýmen qatar, baspana máselesin sheshýge oń áser etpek.
Jergilikti jerde ónim óndirý óte mańyzdy. Qaladaǵy «Dva Kıta» jaýapkershiligi shekteýli seriktestigi jıhaz jasaýmen aınalysady. 2003 jyldan bastap jumys istep kele jatqan kásiporyn 2015 jyly osy zamanǵy ozyq tehnologııamen jumys isteýge múmkindik beretin jańa qural-jabdyqtaryn satyp alyp, jańǵyrý satysynan ótken bolatyn. Búgingi kúni kásiporynnyń buıymdary óz elimizde jáne Reseıdiń saýda núktelerinde suranysqa ıe.
Munan soń Premer-Mınıstr Asqar Mamın «Kamaz-Injınırıng» aksıonerlik qoǵamynda bolyp, kásiporynnyń tynys-tirshiligimen tanysty. Elimizdegi kólik shyǵarý óndirisine qomaqty úles qosyp otyrǵan kásiporynnyń jyldyq qýaty úsh myń kólikke teń. Bul kúnde óndiris qýatyn barynsha arttyryp otyrǵan kásiporyn 2005 jyldan beri jumys isteıdi. Kásiporyn shyǵarǵan kólikterdi Qazaqstannyń kez-kelgen jerinen kezdestirýge bolady. Búginde 700-den astam adam jumys isteıtin kásiporyndaǵy ortasha jalaqy 150 000 teńge.
Sapar sońynda oblystyq ákimdikte óńirdiń áleýetin arttyrý máselelerin jan-jaqty talqylaǵan keńes ótkizildi.