Kezdesýde «Ǵaryshtyq tehnıka jáne tehnologııalar ınstıtýtyn» «Zerde» ulttyq ınfokommýnıkasııalyq holdıngi» aksıonerlik qoǵamyna berýdiń orynsyzdyǵy týraly másele talqylandy. Senator Talǵat Musabaev osy máseleni Senat otyrysynda buryn kótergen bolatyn.
Kezdesýde baıandama jasaǵan sıfrlyq damý, qorǵanys jáne aeroǵarysh ónerkásibi mınıstriniń orynbasary Marat Nurǵojın depýtattardy qalyptasqan jaǵdaı týraly habardar etti.
Atap aıtqanda, ınstıtýt sońǵy ýaqytta kásipkerlik qyzmetti edáýir arttyrǵan bolatyn. Osylaısha, ınfokommýnıkasııalyq tehnologııalardy damytý jobalaryna qatysty ınstıtýt jańalyqtarynyń edáýir bóligi «Yellow Pages Rule» qaǵıdattaryna qaıshy keledi, oǵan sáıkes bıznes usynatyn qyzmetterdi memleket júzege asyrmaıdy. Osyǵan baılanysty, mınıstrlik baǵdarlamalyq qamtamasyz etý men aqparattyq júıelerdi ázirleý jónindegi ınstıtýt jarǵysynda bekitilgen IT-mindetti alyp tastaýdy, sondaı-aq ınstıtýtty «Zerde» aksıonerlik qoǵamyna berýdi usynady.
«Instıtýtty «Zerde» holdınginiń qaramaǵyna berý qazirgi ýaqytta bar ınstıtýttyń tehnologııalyq jáne kadrlyq áleýetin joǵaltýǵa jáne sonyń saldarynan Qazaqstannyń ǵarysh salasyndaǵy bas ǵylymı-zertteý ınstıtýtynyń joıylýyna alyp kelýi múmkin», - dep atap ótti depýtat T.Musabaev. Onyń pikirinshe, ınstıtýttaǵy ǵarysh tehnıkasy men tehnologııalaryn ázirleý salasyna jetekshilik etý úshin «Zerde» holdınginde ǵarysh tehnıkasy men tehnologııalaryn ázirleý máselelerinde quzyretti ǵalymdar men mamandar joq.
Komıtet depýtattary kezdesýdi qorytyndylaı kelip, ınstıtýtty qaıta uıymdastyrý onyń kommersııalyq qyzmeti ǵarysh salasyna zııan keltirmeı damýy tıis ekenin atap ótti. Bul máselede onyń maqsaty - ǵarysh tehnıkasy men tehnologııasynyń jasalýyn ǵylymı-tehnologııalyq qamtamasyz etý bolyp qalýy tıis, osyǵan baılanysty mınıstrlikke ınstıtýttyń qoldanystaǵy qurylymyn saqtaý usynyldy.