Aqtóbe oblysynda Ulttyq biryńǵaı test tapsyrý sońǵy eki kúnnen beri ótip jatyr. Buǵan deıin aýdan ortalyqtarynda bastalsa, búgin qalada bastaý alady. Ol úshin óńir ortalyǵynda úsh arnaıy ortalyq jasaqtalǵan. Sonyń biri – biz turǵan №8 orta mektep.
Osydan bir saǵat buryn munda Bilim jáne ǵylym mınıstrliginiń ókilderi keldi. Olar test tapsyrý barysyn sońyna deıin qadaǵalaıtyn bolady. Odan bólek bes adamnan quralǵan memlekettik komıssııanyń músheleri bar. Olardyń da atqaratyn jaýapkershiligi zor. Barlyǵy da tıisti oryndaryna jaıǵasty. Búgin bul ortalyqta 340 talapker Ulttyq biryńǵaı test tapsyrady. Qazirden bastap mektep túlekterin aýdıtorııaǵa kirgizý bastaldy. Árıne, barlyǵy da bul synaqtyń óte mańyzdy jáne jaýapkershilikke toly ekenin túsinedi.
Jalpy, Aqtóbeniń ózinde 2425 mektep túlegi Ulttyq biryńǵaı test tapsyratyn bolady. Olardyń 159-y «Altyn belgi» jáne júzge jýyǵy úzdik attestat ıegeri. Aýdıtorııalarǵa beınebaqylaý kameralary ornatylyp, qaýipsizdik sharalary qatań baqylaýda. Al talapkerlerdiń synaq tapsyrý sátin olardyń ata-analary onlaın rejıminde kórý múmkindigi ıe.
Al oblys boıynsha talapkerlerdiń UBT tapsyrýy maýsymnyń sońǵy kúnine deıin jalǵasady. Jańa format boıynsha test synaqtary jyl basynan beri eki ret ótti. Biraq memlekettik grant ıesi ataný úshin osy jolǵysy mańyzdy.
Aıta ketý kerek, jalpylaı alǵanda, oblysta 5178 talapker test tapsyrady. Tamyz aıynda ótetin taǵy bir synaq joǵary oqý oryndarynyń aqyly bólimine túsýge múmkindik berýi tıis.