Almaty, Pavlodar jáne Qostanaı oblystarynyń keıbir eldi mekenderinde analogty teleradıo habarlaryn taratýdy kezeń-kezeńmen óshirý qazirdiń ózinde bastalyp ketti.
Almaty oblysynda 772 eldi mekendi sıfrlyq efırlik teleradıo habarlaryn taratýmen qamtıtyn 90 radıotelevızııalyq stansııa paıdalanýǵa engizildi. Analogty teleradıo habarlaryn tolyqtaı óshirý oblysta 28 maýsymda Jarkent qalasynda ótedi. Jobany iske asyrýdyń qorytyndylary boıynsha oblystyń shamamen eki mıllıondaı turǵynyna sıfrlyq sapadaǵy televızııa qoljetimdi bolmaq.
Pavlodar oblysynda da SETHT engizý jónindegi jobany iske asyrý aıaqtaldy. Qazirgi ýaqytta oblystaǵy 385 eldi mekenniń 356-sy sıfrlyq efırlik habar taratýmen qamtyldy. Kózdelgen maqsattarǵa qol jetkizý úshin oblysta 29 radıotelevızııalyq stansııa salynyp, jańǵyrtyldy. Bıylǵy 1 shildeden bastap Pavlodar qalasynyń radıotelevızııalyq stansııasynda búkil oblys boıynsha analogty teleradıo habarlaryn taratýdy óshirý júrgiziledi.
Jobany sátti iske asyrý maqsatynda Qostanaı oblysynda 59 RTS salynyp, jańǵyrtyldy, olardyń ishinde 32-si jańadan turǵyzylǵan. Barlyq jumystardyń qorytyndysy boıynsha sıfrlyq efırlik teleradıo habarlaryn taratýmen qamtý deńgeıi óńir halqynyń 98%-yn qurady, bul – 627 eldi-meken.
Búkil oblys boıynsha analogty teleradıo habarlaryn taratýdy tolyqtaı óshirý Qostanaı qalasyndaǵy radıotelevızııalyq stansııada 1 shildede atqarylady.
Analogty efırlik habar taratýdy óshirý men sıfrlyq efırlik telehabar taratýǵa kóshý Qazaqstanda bekitilgen kestege saı júrip jatyr. 2018 jyly AETHT tolyqtaı óshire otyryp, sıfrlyq efırlik telehabar taratýǵa kóshý Mańǵystaý, Jambyl, Túrkistan oblystary men Shymkent qalasynda júzege asyryldy.