Memleket basshysy Qasym-Jomart Toqaev Qazaqstan Týyn kókte jelbiretýdiń mańyzy týraly aıtty.
– Qazaqstannyń Týy joǵary áýelep kóterilgende júregimizdi táýelsiz elimizdiń barlyq jetistigine degen maqtanysh sezimi baýrap alady. Bas qalamyz qalyptasqan sátten bastap, damýdyń qazaqstandyq úlgisiniń aıqyn jetistikke jetkenin kórsetip keledi, – dedi Qasym-Jomart Toqaev.
Memleket basshysy áskerı oqý orny túlekteriniń aldynda sóılegen sózinde Qazaqstannyń Týyn óńirde jáne búkil Jer sharynda qaýipsizdik pen turaqtylyqty qamtamasyz etýge baǵyttalǵan beıbitshilik pen salıqaly saıasattyń sımvoly retinde búkil álem biletinin aıtty.
– Qazirgi kúrdeli jahandyq ahýalda bizdiń er-azamattarymyz túrli shıelenis oshaqtaryna baryp, bitimgerlik mıssııasyn abyroımen atqarýda. Bilikti áskerı qyzmetker adamgershilik qundylyqtaryn bıik ustaıtyn, temirdeı tártipti saqtaıtyn, tabandy eńbek etetin adam bolýy tıis. Qazaqstannyń qaýipsizdigi – sizderdiń sapaly jumystaryńyzǵa tikeleı baılanysty, – dedi Qasym-Jomart Toqaev.
Rásim barysynda joǵary áskerı oqý oryndary men akademııalardyń 27 úzdik túlegi Qazaqstan Prezıdenti – Qazaqstan Qarýly Kúshteriniń Joǵarǵy Bas qolbasshysynyń qolynan ofıser pogonyn aldy.
Mundaı mártebege Qorǵanys mınıstrligi Qurlyq áskerleri áskerı ınstıtýty, Radıoelektronıka jáne baılanys áskerı-ınjenerlik ınstıtýty, Ulttyq qaýipsizdik komıteti Shekara qyzmeti akademııasy, Ishki ister mınıstrliginiń Almaty, Qaraǵandy, Qostanaı polısııa akademııalary men Tótenshe jaǵdaılar komıtetiniń Kókshetaý tehnıkalyq ınstıtýtynyń tańdaýly túlekteri ıe boldy.
Osynaý saltanatty shara barysynda ıyǵynda sý jańa juldyzdar jarqyraǵan jas leıtenanttarǵa da sóz berildi.
Ishki ister mınıstrligi Qaraǵandy akademııasynyń túlegi, leıtenant arnaıy ataǵyn ıelengen Nazgúl Qojamjarova:
«Asa mártebeli Joǵarǵy Bas qolbasshy myrza! Eńseli elorda kúniniń aldynda sizdiń qolyńyzdan osynaý áskerı shendi saltanatty túrde alý men úshin úlken qýanysh. Búgin sizdiń qolyńyzdan alǵan ofıser juldyzshasy bizge ulttyq qaýipsizdikti saqtaýǵa, azamattardyń, áriptesterimiz ben otbasylarymyzdyń tynyshtyǵyn qorǵaýǵa, sondaı-aq ishki ister organdarynda qalyptasqan berik dástúrdi jalǵap, Qazaqstan ofıseriniń mártebesin túsirmeý jolynda úlken jaýapkershilik júkteıdi» dese, Ulttyq ulan áskerı ınstıtýtynyń túlegi, leıtenant arnaıy ataǵynyń ıegeri Abylaı Toqtan:
«Men úshin búgingi kún – erekshe qýanyshty kún. Elordamyzdyń merekesinde saltanatty túrde áskerı shen alý árbir sarbazdyń armany dep bilemin. Elorda – Qazaqstannyń Tuńǵysh Prezıdenti Nursultan Ábishuly Nazarbaevtyń egemen elimizdiń táýelsizdik jolynda atqarǵan oń isteriniń mazmunymen órnektelgen kestesi. Elordamyz kúnnen-kúnge ózgerip, damyp keledi. Biz, Qazaqstannyń jas ofıserleri Jastar jyly aıasynda joǵary oqý ornyn aıaqtap, bar kúsh-jigerimizdi egemen elimizdiń damýyna jáne áskerı kúshterimizdiń qataryn nyǵaıtýǵa jumsaımyz dep sendiremiz», dedi.
Munan soń joǵaryda atalǵan oqý oryndarynyń kýrsanttary sap túzep, kópshilik aldynan kerneıletip júrip ótti.
Sońynda Q.Toqaev barlyq qatysýshylardy kele jatqan astana kúnimen quttyqtap, Qazaqstan halqyna beıbitshilik pen baq-bereke tiledi.