Keńeske Joǵarǵy sottyń sýdıalary, jekelegen memlekettik organdar men uıymdardyń basshylary men ókilderi, oblystyq jáne oǵan teńestirilgen sottardyń tóraǵalary, Joǵarǵy sot departamenti men onyń qurylymdyq bólimsheleriniń, sondaı-aq Sot tóreligi akademııasynyń basshylyǵy da qatysty.
J.Asanov keńes jumysyn asha kele, «Sot tóreliginiń 7 túıini» baǵdarlamasy aıasynda ondaǵan qanatqaqty jobalardy iske asyrý nátıjeleri: «Túngi» jáne «Otbasylyq» sottar, «Tatýlastyrýshy-sýdıa», «Sýdıa kómekshisi», sottan tys tatýlasý ortalyqtary, front-keńseler týraly aıtyp berdi.
– Biz bul jobalardyń adamdarǵa shynymen paıdaly ekendigine kóz jetkizdik, osylaısha eń túıtkildi máselelerdi eńserdik. Sondaı-aq shekten tys júkteme boıynsha jaǵdaı turaqtandy. Keshendi ári júıeli jumys atqarylýda, onyń maqsaty – sot tóreligin sapaly júzege asyrý, – dedi J.Asanov.Keńes barysynda Joǵarǵy sot tóraǵasy sottarǵa qoıylatyn yńǵaısyz saýaldarǵa jaýap berdi. «Sýdıalyqqa «tanystyq» nemese aqsha arqyly baryp jatady, sýdıalar quqyq qorǵaý organdarynyń jeteginde júr, sottar memlekettiń múddesin adamnan joǵary qoıady», degen sıpattaǵy pikirdi J.Asanov jónsiz dep sanaıdy. Ol sottardyń atyna jıi qoıylatyn júıeli synǵa jaýap bere kele, olardy úsh topqa bóldi: qylmystyq sot tóreligi, memlekettik organdarmen aradaǵy jeke adamdar men bıznestiń daýlary jáne sýdıalyq kadrlar.
Joǵarǵy sot tóraǵasy 2020 jyly sot tóreligi salasynda sapalyq ózgerister oryn alatynyna jáne aldaǵy 2 jyl ishinde aqtaý úkimderi sanynyń 6 esege artatynyna senim bildirdi.
J.Asanov aıyptaýshylyq baǵyttan qalaı qutylýǵa bolatynyn, Ákimshilik ádilet kodeksiniń jobasy, sýdıalyq kadrlardy irikteýdiń jańa júıesin qurý, sondaı-aq sýdıalar korpýsyn kásibı emes, sybaılas jemqorlyqqa ushyraǵan sýdıalardan tazartýdyń jańa ádistemesin engizý týraly aıtyp berdi.
– Jalpy, sot júıesiniń eń basty bir ǵana problemasy bar dep aıtatyn bolsaq, ol – sýdıalyq kadrlar. Bıylǵa deıin sýdıalyqqa myqty zańgerler umtylmaıtyn. Nege? О́ıtkeni bizdiń bar qıynshylyǵymyzdy, jalaqymyz tómen ekendigin, júkteme kóp ekendigin biledi. Tipti prokýrorlar da, advokattar da, basqa zańgerler de sot qyzmetine kelgisi joq. Sonda «sýdıa bolamyn dep konkýrsqa qatysyp jatqandar kimder?» degen suraq týady. Olardyń basym kópshiligi sottaǵy tehnıkalyq qyzmetkerler – sot hatshylary. Joǵary Sot Keńesiniń otyrysynda azamattardy óz erkimen jumystan shyǵarý máselesi qaralady. Biz sonda odan «sebebi qandaı?» dep suraımyz. Negizinen eki sebep aıtady: «Aldymen jalaqy az, odan keıin jeke ómirge ýaqyt joq». О́ıtkeni kúnine árbir sýdıa 10 sheshim qabyldaıdy. Bulardan bólek úshinshi sebep te bar. Nur-Sultan, Almaty, Shymkent qalalaryna, oblys ortalyqtaryna aýysý, basshylyq qyzmetke taǵaıyndalý boıynsha sot júıesiniń ishinde ádildik bolmaǵanyn alǵa tartady, – dedi Joǵarǵy sot tóraǵasy.
Jıyn barysynda Joǵarǵy sottyń Azamattyq ister jónindegi sot alqasynyń tóraǵasy Meırambek Taımerdenov, Joǵarǵy sottyń mamandandyrylǵan alqasynyń tóraıymy Aıgúl Qydyrbaeva sóz sóıledi.
Oblystyq jáne oǵan teńestirilgen sottardyń birqatar tóraǵalary da esep berdi.
Keńes sońynda J.Asanov sýdıalar korpýsyna birqatar mindetter júktedi. Áriptesterin sot tóreligin jańa jaǵdaıda atqarýǵa daıyn bolý qajettigin eskerte otyryp, ol sýdıalardy sot tóreligin júzege asyrýda joǵary senimdi aqtaýǵa shaqyrdy.
Joǵarǵy sot tóraǵasy elimizdiń joǵarǵy sot organynyń ádil sot tóreligine, quqyq ústemdigi men qoǵamdaǵy turaqtylyqqa qol jetkizýge baǵyttalǵanyn atap ótti.