«Amplıtýda» – san alýan taqyrypta jumys isteıtin jas sýretshiler toby. Jas ta bolsa olar Qazaqstanda, alys shetelderde tanylyp úlgerdi. Toptaǵy sýretshilerdiń kórkem tilderi túrli bolǵanymen, tórt sýretshiniń basyn qosyp, ortaqtastyratyn dúnıe – túske degen qushtarlyq. Kórmedegi «Tańǵajaıyp adamdar» baǵdarlamasy arqyly TMD elderi kórermenderine keń tanylǵan, sýretti kózin jumyp salatyn Renat Elýbaevtyń, sándik-qoldanbaly ónermen qatar keskindememen, sondaı-aq qoǵamdyq jumystarmen de belsene aınalysatyn Gúldana Jurqabaevanyń sıýjetti kartınalary mazmun keńdigimen erekshelenedi. Al abstraktili beıneleý arqyly ıdeıany ashyq boıaýlar arqyly áserli jetkizetin Marııa Bendarskaıa men Venesııa bıennalesiniń qatysýshysy, Qazaqstanǵa arnaıy shaqyrýmen kelgen sýretshi «Astana Opera» teatrymen tyǵyz shyǵarmashylyq qarym-qatynasta jumys istep júrgen Naıra Týmanıannyń sońǵy jumystary sýretshi túısingen shyndyqty aıqyn kórsetedi.
Ǵaryshtyq atmosferany kenep betine sýrettegen avtor Gúldana Jurqabaeva óz oıyn bylaı jetkizedi: «Kórmege qoıylǵan bizdiń týyndylarymyzdy kórgen jan ne aıtqymyz kelgenin sózsiz uǵatynyna kúmánim joq. Ataýynyń ózi túrli-tústi kartınalardyń emosıonaldy tetigi deýge keledi. Sondyqtan ár qylqalam ıesi – ózinshe jasampaz tulǵa. О́zge sýretshiler sııaqty men de ómirden, mahabbattan, sezimnen nár alamyn. Meniń shyǵarmalarymnyń basty nysany adamdar. Munda da áıgili eki áıelge arnalǵan eki týyndym qoıyldy. Olardyń jarqyn beınesi, bolmysy, shyǵarmashylyǵy meni erekshe tańdandyrdy. Men olardan ózimdi kóremin».
Jańa býyn sýretshileri búgingi zamannyń kýágeri retinde konseptýaldy sheshimge qulash sermeı otyryp, kompozısııalyq yrǵaqty árqıly jetkizedi. Qulpyrǵan boıaýlar dınamıkasy kórinbeıtin shyndyq realızmin qııal jeteginde sharyqtady. «Olardyń oılanysy, úmiti, tabysy, baqyty, qııaly men daýysy jas sýretshilerdiń tolassyz izdenis ústinde júrgenderin kórsetedi. Biri abstraksııaǵa den qoısa, endi biri forma arqyly izdenedi. Bul jolǵy jumystaryn salystyra qaraı otyryp, búgingi boıaýlarynda sary, qyzyl, kók syndy biryńǵaı jaǵymdy túster basym túsken. Jaqsylyqty izdeý, kórgen-bilgenin óz shyǵarmashylyǵynda kórsetý. Boldy, toldy dep aıta almaımyz, ár kórme – ósý, damýmen sabaqtasady. Jastar keshegi men búgingi jeńisterdi óz jumystarynda úndestirip, aıdaı álemge kórsete alsa degen tilegim bar», degen Qazaqstannyń mádenıet qaıratkeri, ardager sýretshi Ermek Asylhanov jastardyń shyǵarmashylyq izdenýdegi ýaqyt tynysyn dóp basar erkindik pen bostandyq ıdeıasyn aldyńǵy qatarǵa qoıady.