Negizinde «Spektr-RG» observatorııasyn ushyrý 21 maýsymǵa belgilengen bolatyn. Zymyrantasyǵysh aýyl arasynda borpyldaq shańdy aspanǵa atyp júrgen mashına emes, sál aqaý shyqsa barlyq prosess toqtatylady. 12 shildege aýystyrylǵan sebebi zymyrandy ushyrýǵa daıyndaý kezinde sıklogrammadaǵy qatelikten ǵarysh apparatynyń qyzdyrǵyshy ýaqytynan buryn qosylyp, saldarynan hımııalyq tok kózi otyryp qalǵan eken. Tok kózi bir ret qana paıdalanýǵa jaraıtyndyqtan, ony almastyrý úshin zymyrandy montajdaý-synaq korpýsyna qaıtarýǵa týra kelgen. Baıqońyr ǵarysh aılaǵynda mamandar observatorııanyń saparyn keıinge qaldyrýǵa sebep bolǵan barlyq aqaýdy joıdy.
«Spektr-Rentgen-Gamma» observatorııasy – Reseı men Germanııa birigip iske asyryp otyrǵan halyqaralyq joba. Ǵalamdy rentgen dıapazonynda zertteýge arnalǵan orbıtalyq astrofızıkalyq observatorııa qurýdy dittegen sapardan Qazaqstannyń da kútip otyrǵany kóp.
Qyzylorda oblysy