Búgin Beıneý aýdany, Tájen aýylynda «Beıneý-Aqjigit-О́zbekstan Respýblıkasy» baǵytyndaǵy respýblıkalyq mańyzy bar avtokólik jolynyń ashylý rásimi ótti. Saltanatty sharaǵa Qazaqstan Respýblıkasynyń Premer-mınıstri Mamın Asqar Uzaqbaıuly jáne О́zbekstan Respýblıkasynyń Premer-mınıstri Arıpov Abdýlla Nıgmatuly qatysty.
Bul jańa jolmen qazaqstandyqtar О́zbekstan Respýblıkasy arqyly ózge elderge shyǵa alatyn bolady. Ortalyq Azııa elderinen Aqtaý jáne Quryq teńiz porttary arqyly Kavkaz elderi men Eýropa baǵyty boıynsha tranzıttik avtomobıl aǵyny qalyptasady.
Joldyń jalpy uzyndyǵy 85 shaqyrymdy quraıdy. Qurylys jumystary 2017 jyly bastalǵan bolatyn. Nysanǵa barlyǵy 381 adam, 155 birlik tehnıka jumyldyrylǵan.
Memleketaralyq mańyzy bar osynaý eleýli joba Qazaqstan jáne О́zbekstan elderiniń ekonomıkalyq damýyna úlken serpilis, ekijaqty yntymaqtastyqtyń damýyna qosymsha serpin bermek.
Mańǵystaý oblysy