Tyrnaqaldy týyndynyń tyń tynysy

Aldymen osy ujym­nyń beldi akteri, máde­nıet qaı­ratkeri Bolat Mamyt­be­kovtiń áli sııasy kebe qoı­maǵan tyrnaqaldy týyn­dysyna arqaý bolǵan tul­ǵa jaıly birer sóz. Noǵaı­baı Batyrbekuly 1834–1917 jyldary qazirgi M.Ju­mabaev aýdanynda ómir súr­gen. Qazaqstan men Reseı mu­raǵat­tarynda saqtalǵan qu­jattarǵa qaraǵanda Polý­dın bolysyn basqara otyryp, el, jer daýlaryna aralasyp, halyq paıdasyna sheship otyrǵan. Ot aýyzdy, oraq tildi sheshen, bı retinde ádildigimen qara qyldy qaq jarǵan. Memleketaralyq má­selelerge de aralasyp, pat­shalyq otarlaý saıasatyna qar­sylyǵyn ashyq bildirgen. Reseıdiń áleýmettik saıası ar­hıvinen babamyzdyń bir top bılermen 1876–1877 jyl­dar­daǵy orys-túrik so­ǵy­­sy­na qatysty patshaǵa jol­da­ǵan haty tabylǵan. So­ǵan qaraǵanda túbi bir túr­ki týys­qandarǵa qoldaý kór­se­­týge tyrysqanyn ańǵarý qıyn emes. Omby arhıvinde saqtalǵan bir qujatta patsha shekaralyq aımaqta ty­nysh­tyq, aýyzbirshilik or­na­týǵa zor úles qosqan bıge óz rı­za­shylyǵyn bildirgeni aı­tylǵan.

Spektakl jelisi halqyna pana, ultyna qamqor bolǵan tulǵanyń ómirinen alynǵan naqty oqıǵalar negizinde quryla otyryp, parasatty, kemeńgerlik bıik tulǵasyn jan-jaqty somdaýǵa arnal­ǵan. Erli-zaıyptylar ara­syndaǵy turmystyq janjaldardan bastap jer, mal daýy, otarlaý saıasaty ábden dendegen qoǵamdaǵy shytyrman qaıshylyqtar anyq ta nanymdy sýretteledi. El birligi, ata­kásipti damytý, aǵaıyndyq tatýlyq, oqý-bilimge shaqyrý máseleleri talqyǵa túskende bıdiń «yntymaqsyz eldi urys bıleıdi. Yntymaqty eldi yrys bıleıdi. Biz ketermiz.Endigi el men jerdiń ıesi de, kıesi de sendersińder. B­úgin urpaqtyń aldynda ama­nat arqalap tursyń, dep jas quraqtaı jelkildep ósip kele jatqan uly Aqylbekke aq batasyn berýi urpaqtar arasyndaǵy sabaqtastyqtyń jalǵastyǵyn, ata-baba dás­túri úzilmeıtinin, onyń arǵy ja­ǵynda «uıada ne kórseń ush­qanda sony ilesiń» degen tá­lim-tárbıeniń jatqanyn bil­diredi.

Basty róldi teatr dırektory Birjan Jalǵasbaev sátti somdap shyqqan. Akterler Nur­bol Qumarshıev, Dáýren Toıbazarov, Asylhan Rázıev te, kórkemdik jetekshi, «Da­ryn» memlekettik jas­tar syılyǵynyń ıegeri Far­had Moldaǵalı da ózde­rine júk­telgen talap úde­sinen kó­rine bilgen. Jurtshy­lyq­tyń qaıta-qaıta qol soǵyp, úlken qoshemet kórsetýi preme­ra­nyń oıdaǵydaı ótkenin ańǵartsa kerek.

Soltústik Qazaqstan oblysy