A.j. 18 shildede Nur-Sultan qalasynda QR Premer-Mınıstriniń orynbasary G. Ábdiqalyqovanyń tóraǵalyǵymen 2020 jyly qazaq halqynyń uly aqyny, aǵartýshysy Abaı Qunanbaıulynyń týǵanyna 175 jyldyq mereıtoıyn daıyndaý jáne ótkizý jónindegi memlekettik komıssııanyń alǵashqy otyrysy ótti.
Bıyl 30 mamyrda «Abaı Qunanbaıulynyń 175 jyldyq mereıtoıyn merekeleý týraly» QR Prezıdenti Q.K. Toqaevtyń Jarlyǵy bekitildi. Mereıtoıdy daıyndaý jáne ótkizý jónindegi memlekettik komıssııa quryldy. Onyń quramyna Parlament depýtattary B. Jumaǵulov, S. Ábdirahmanov, kórnekti jazýshylar men qoǵam qaıratkerleri O. Súleımenov, R. Seısenbaev M. Áýezov, ortalyq memlekettik organdardyń basshylary, sondaı-aq elimizdiń akademııalyq jáne shyǵarmashylyq qaýymynyń ókilderi endi.
Vıse-Premer otyrystyń ashylýynda Elbasy N. Nazarbaevtyń sózderine kóńil aýdartty.
«Abaı álem moıyndaǵan dana ustaz, aqyn jáne adamzattyń danyshpany. Danyshpan Abaıdyń ulylyǵy men ereksheligi, tabandylyq pen maqsattylyqty dáripteı jáne onyń óz ultynyń sanasyna engize otyryp, ulttyq rýhty buryn-sońdy bolmaǵan bıiktikke kótere aldy. Biz Abaıdyń boıynan tabylatyn tulǵaǵa laıyqty, maqtan tutatyn rýhanı tiregimizdiń baryna alǵys aıtýymyz kerek», - dedi G. Ábdiqalyqova.
Otyrysta halyqaralyq, respýblıkalyq jáne óńirlik deńgeıdegi 500-ge jýyq túrli is-sharalar ótkizý josparlanǵan Abaı Qunanbaıulynyń 175 jyldyq mereıtoıyn daıyndaý jáne ótkizý jónindegi jalpyrespýblıkalyq jospar jobasy qarastyryldy.
Máselen, Nur-Sultan qalasynda halyqaralyq ǵylymı-tájirıbelik konferensııa, Parıj qalasyndaǵy IýNESKO-nyń shtab-páterinde «Abaı» kórkem fılminiń óndirisi men shyǵarylymy, Abaı shyǵarmalarynyń shet tilderine aýdarylýy men jaryqqa shyǵarylýy, sondaı-aq Abaı úıi-mýzeıiniń jan-jaqty tanymaldyǵyn arttyrý is-sharalary, Abaıdyń «Jıdebaı-Bórili» memlekettik tarıhı-mádenı jáne ádebı-memorıaldyq mýzeı-qoryǵyna ǵylymı-restavrasııalyq jumystar júrgizý, Abaıdyń ákesi – Qunanbaıdyń tulǵalyq mańyzdylyǵy men tarıhı-mádenı rólin arttyrý boıynsha sharalar qabyldaý kózdelgen.
Buǵan qosa, búgingi kúni áleýmettik jelilerde sátti iske asyrylǵan #Abai175 chellendji jahandyq formatta jalǵasyn tabatyn bolady.
«Abaı Qunanbaıulynyń 175 jyldyq mereıtoıyn merekeleý halyqtyń tarıhı sanasyna sińirý jáne elimizdiń rýhanı mádenıetin jahandyq formatta ilgeriletýge baǵyttalǵan Táýelsiz Qazaqstannyń jańa tarıhyndaǵy mańyzdy oqıǵalardyń biri», - dep atap ótti G. Ábdiqalyqova.
Sońynda QR Premer-Mınıstriniń orynbasary G. Ábdiqalyqova memlekettik organdarǵa birqatar tapsyrmalar berdi.