Memleket basshysy MAGATE-niń Bas dırektory Iýkııa Amanonyń qaıtys bolýyna baılanysty kóńil aıtý jedelhatyn joldady, dep habarlady Aqordanyń baspasóz qyzmeti.
Qazaqstan Prezıdenti Qasym-Jomart Toqaev Qazaqstan halqynyń jáne jeke óziniń atynan MAGATE-niń Bas dırektory Iýkııa Amanonyń qaıtys bolýyna baılanysty kóńil aıtty.
Jedelhatta Iý.Amanonyń ómirden ótýi barlyq halyqaralyq qoǵamdastyq jáne búkil álemdegi kóptegen adam úshin aýyr qaza ekeni atap ótildi.
Qazaqstan Prezıdenti MAGATE basshysynyń ıadrolyq qarýdy taratpaý jáne ıadrolyq energııany jahandyq deńgeıde beıbit maqsatqa paıdalaný úshin atqarǵan róli zor ekenin aıtty.
«Biz Qazaqstannyń aınymas dosy jáne jahandyq álemdegi qaýipsizdiktiń qorǵaýshysy Iýkııa Amano myrzanyń jarqyn beınesin eshqashan umytpaımyz» – dep jazdy Qasym-Jomart Toqaev.