Búginde Túlkibastaǵy kásipkerler jaqsylyq jasaýdan jarysqa túsip jatqandaı. Mine, sondaı izgilikti isti temir jol boıynda ornalasqan Túlkibas kenti men tabıǵaty kóz tartar Iirsý aýylynyń turǵyndary bastap otyr.
Únemi aınalasyna jaqsylyq jasaýdy ádetke aınaldyrǵan kóp balaly kásipker ana Aıymkúl Matkarımova óz otbasy atynan kent ortalyǵyna 2 mln teńge qarjyǵa zamanaýı úlgidegi aıaldama salyp berdi. Osylaısha, ol jazdyń aptap ystyǵy men qystyń qaqaǵan sýyǵynda qoǵamdyq kólik kútken turǵyndarǵa yńǵaıly jaǵdaı jasap otyr.
Elbasy «Bolashaqqa baǵdar: rýhanı jańǵyrý» atty baǵdarlamalyq maqalasynda «Basqa aımaqtarǵa kóship ketse de, týǵan jerlerin umytpaı, oǵan qamqorlyq jasaǵysy kelgen kásipkerlerdi, sheneýnikterdi, zııaly qaýym ókilderi men jastardy uıymdastyryp, qoldaý kerek», degen edi.
Anyǵynda, kez kelgen aýyldyń kelbetine qarap, sol aımaqtan shyqqan azamattardyń qandaı ekenin ańǵarýǵa bolady. Aýyly jaınap tursa, demek kindik kesken jerine búıregi burar ıgi jaqsylar kóp degen sóz.
Túlkibas aýdany, Iirsý aýylynyń týmalary da sondaı elge qamqor jandar. Erterekte aýyldan aýdan ortalyǵyna kóship ketken jeke kásipker Ábilhan Daýylbaev ta aýyldastaryna jaqsylyq jasaýdy jón sanapty. Aýyl kóshelerine 9 mln teńgege sońǵy úlgidegi 64 dana shamdar men 64 dana jańa temir-betondy elektr baǵanalaryn ornatqyzyp, SIP symyn tartyp beripti.
Búginde túni kúndizgideı aýyldyń jasynan jasamysyna deıin Ábilhannyń ıgilikti isin súıinishpen aıtyp júr.
Túrkistan oblysy