Úkimet basshysy jańa ferroqorytpa zaýytynyń ashylýymen quttyqtap, óńirdiń odan ári áleýmettik-ekonomıkalyq damýy úshin joǵary tehnologııalyq kásiporynnyń mańyzdylyǵyn atap ótti. Jobanyń ereksheligi – «Indýstrııa 4.0» baǵdarlamasy aıasynda óndiristik sıkldiń jańa tehnologııalyq ázirlemelerin engizýi.
Kásiporynda alǵashqy kezeńderde jylyna tolyqtaı eksportqa baǵdarlanǵan 180 myń tonna ónim shyǵarý kózdelgen.
«Aldaǵy ýaqytta jyl saıyn 240 myń tonnaǵa deıingi kólemde ónim shyǵarý kózdelgen», degen A.Mamın, gaz tazartý júıeleri kesheni men kómirdiń ornyna elektr qýatyn paıdalaný atmosferaǵa taralatyn zııandy qaldyqtardy tolyqtaı beıtaraptandyratynyn, sáıkesinshe, qorshaǵan ortaǵa teris áseri barynsha az bolatynyn atap ótti.
Jańa ferroqorytpa zaýyty metallýrgııa salasyndaǵy basty kásiporyndardyń birine aınalady jáne óńirdiń ǵana emes, elimizdiń áleýmettik-ekonomıkalyq damýyna oń úlesin qosady.
Ferrosılısııdiń negizgi kólemi Reseıge, Túrkııaǵa, Ońtústik Koreıaǵa, AQSh-qa jáne Eýropalyq odaq elderine jetkiziledi. Sonymen qatar daıyn ónim óndirý kezindegi qazaqstandyq qamtý úlesi 94%-dan asady.
Zaýyt qurylysy kezeńinde myń jarymnan astam jańa jumys orny quryldy. Ony paıdalaný kezeńinde 350 turaqty jumys orny ashylady, ekinshi kezeń iske asyrylǵan jaǵdaıda, olardyń sany 550-ge deıin artady.
Premer-Mınıstr Qaraǵandy oblysynyń Qazaqstannyń óńdeý, metallýrgııa, taý-ken óndirý ónerkásibi, qara jáne tústi metallýrgııa, mashına jasaý salasyn damy-
týdaǵy mańyzdy rólin atap ótti.
«Qaraǵandy oblysynda ónerkásipti ártaraptandyrý, júıe qurýshy kásiporyndardy jańǵyrtý, ınvestısııalar tartý jumystary jalǵasyp jatyr», degen A.Mamın, barlyq tartylǵan ınvestısııalardyń 93%-y – jeke, onyń jartysy sheteldik qarajat ekenin aıtty. Oblysta 1 trln-nan astam teńgege 35 jańa iri ınvestısııalyq joba iske asyrylyp jatyr, olardyń 17-si sheteldikterdiń qatysýymen qolǵa alyndy. 2019 jyldyń birinshi jarty jyldyǵynda ınvestısııalar ósimi 72%-dy qurady.
Premer-Mınıstr óńirge jumys sapary barysynda «Alaıǵyr» ken ornynyń qorǵasyn-kúmis kenin óńdeıtin jáne baıytatyn, katodty mys óndiretin kásiporyndaryna, sondaı-aq «Kóktasjal» ken orny bazasyndaǵy taý-ken baıytý keshenine bardy.
Asqar Mamın «SES Saran» kún-elektr stansasyn tekserip, Qaraǵandy qalasynyń soltústik jáne shyǵys aınalma jolynyń rekonstrýksııalanǵan bóligimen tanysty. Uzyndyǵy 20 shaqyrymnan astam «Qarasor kólinen aınala Kókpekti-Qaraǵaıly» aınalma temir jol jelisi qurylysy jobasyn qaraý barysynda sý tasqyny saldarynan zııan keltirilgen shoıyn jol jelisiniń bóligin qalpyna keltirý jumystarynyń barysy týraly baıandaldy.
Qaraǵandy oblysy