Beınelep aıtqanda, ony jumsaq konteıner nemese berik qapshyqtar dese de bolady. Olardyń júk kóterý qýaty 500-den 2000 kılo aralyǵynda. Tutas bir fabrıka qyzmetin atqara alatyn biregeı qurylystyń jobasyn 4 kezeń boıynsha júrgizý kózdelgen. Oǵan jumsalatyn qarajattyń kólemi 1 mıllıard teńgeni quraıdy.
– Alǵashqy kezde qarjynyń jartysy ıgerilip, soǵan sáıkes qapshyqtardy tigetin jáne pishetin seh iske qosyldy. Elimizde balamasy joq ózgeshe ónimdi paıdalaný arqyly taǵamdar men kúkirtti jáne sement pen qumdy tasymaldaýdyń, saqtaýdyń jańa múmkindikteri ashyldy ári osy tektes taýarlardy tıeý men túsirýdiń tıimdi tásili óndiriske engizildi, – deıdi «Aqtóbe ÁKK» AQ basqarma tóraǵasy Rýslan Mamýnov.
– Jańa kásiporynnyń ashylýy Aqtóbe polımer fabrıkasy qurylysy birinshi kezeńiniń aıaqtalýymen tuspa-tus keledi. Búginde munda 30 adam jumys isteıdi. Fabrıkanyń jumysy aýyr júk kóterýge tózimdi polıpropılendi matany ázirleýden bastalady. Sondyqtan da biz eń aldymen jobanyń osy qyryn josparlap otyrmyz, – dedi jańa kásiporynnyń dırektory Botagóz Taıbókenova.
Aqtóbe ındýstrııalyq aımaǵynan tyń kásip ıelerine 2 gektar jer bólingen. Oǵan barlyq qolaıly jaǵdaı jasalyp, ınjenerlik jeliler tartylǵan. Búginde kásiporyn jetekshileriniń marketıngtik taldaýlar júrgizýge basa nazar aýdaryp otyrǵany da ónimge degen suranys kólemin kóbeıtýge kómegin tıgizeri anyq. Árıne mundaǵy negizgi tapsyrys berýshiler taý-ken óndirý ónerkásibi kásiporyndary bolmaq.
Jańa kásiporyndarda ónim sapasyna aıryqsha kóńil bólingen. Qajetti shıkizat ázirge Reseıdegi Chelıabi jáne Iаroslavl qalalarynan jetkizilip jatyr.
Qazirgi kezde FIBC KAZAKHSTAN kompanııasynyń negizgi tutynýshysy «Teńizshevroıl» kompanııasy bolyp otyr. Menshik ıeleriniń az ýaqyt ishinde azýy alty qarys kompanııamen birge jumys isteý tájirıbesin ornyqtyra bilgeni de atap aıtýǵa turarlyq. Búginde atalǵan eki tarap ónimdi jetkizý men tutyný jóninde ózara kelisimshart jasaǵan.
Kásiporyn jobalyq qýatynyń 40 paıyzdyq deńgeıinde iske qosylǵan. Qolda bar jabdyqtar men óndiristik mashınalar jylyna 30 myń vagon synasy men 300 myń jumsaq konteıner shyǵara alady. Al joba tolyq qýatyna qosylǵan kezde jylyna bir mıllıon dana qatty qapshyq shyǵarylmaq. Sondaı-aq jobany júzege asyrýdyń ekinshi kezeńinde óndiristik sehtyń aýmaǵy men kólemi odan ári ulǵaıady dep kútilýde. Al sońǵy úshinshi kezeńinde polıpropılendi jetildirýge arnalǵan seh qurylysy men shıkizat bazasyn ázirleý isi qolǵa alynbaq.
AQTО́BE