Jylqynyń qadir-qasıetin jete tanydyq degenimizben, áli de tylsym syry taýsylatyn emes. Taıaýda atty polısııa qyzmetkerleri sal aýrýyna shaldyqqan balalardy ońaltý baǵytynda tosyn bir ıgi isti qolǵa aldy.
Ippoterapııa emdeý tásili álmısaqtan belgili. Tipti ǵylymı turǵyda jan-jaqty dáleldengen dep aıtýǵa da bolady. Mundaı sharalar shetelderde tabysty qoldanylýda. Asylynda atqa mingen adamnyń omyrtqa súıekteriniń arasy ashylyp, barlyq bulshyq etteri úzdiksiz qozǵalysqa túsip, aǵzaǵa jaǵymdy áser etetindigi daýsyz.
Polısııa qyzmetkerleriniń aıtýlaryna qaraǵanda, «Cherkez» jáne «Rıchard» atty jylqylar balalardyń eń súıikti kólikteri. Talaıdyń taqymy tıip kóndikken, úrkýdi, ala qashýdy bilmeıtin qoıdan qońyr, jýas janýarlar alshań basqan aıańynan jańylmaıdy. Balalar attanar jaǵynan kelip úzeńgige aıaqtaryn salyp umtylǵanda da mańqıyp tura beredi. Alǵashqy bette qala balalary qaradaı úrkip, jolaǵylary kelmegenimen, birte-birte atqa minýdiń qyzyǵyn uǵyna bastaǵan. Burynǵylar «jylqy ústinde jelik bar» dep tegin aıtty deısiz be.
– Syrqat balalardyń emdelip, qatarǵa qosylyp ketkenin kórýdiń ózi bir baqyt,–deıdi Kókshetaý qalalyq polısııa basqarmasynyń bastyǵy Janat Eshimov,–áıtkenmen bul bir kúndik qana shara emes, basqarma osyndaı sheshim qabyldap, «Meıirim» balalardy damytý ortalyǵy jáne №4 arnaıy mektep-ınternatynyń basshylyǵymen ózara kelisimge kelip otyr. Aldaǵy ýaqytta syrqat balalar aptasyna eki márte atqa minip, serýendeı alady.
Bul sharýa aǵymdaǵy jyldyń maýsym aıynan bastap qolǵa alynǵan. Ázirge 16 sabaq ótkizilipti. Ol sabaqtarda sal aýrýy týraly túsinik beriledi. Ári atqa minýdiń tıimdiligi de aıtylady. Igi isten nátıje shyǵyp jatsa, aldaǵy ýaqytta atqumarlardy kóptep tartpaq.
Kókshetaý qalasy